لهذا لا أحبه

هذا الصندوق لطالما لم احبة

ولكن وضعتة لزوم الديكور

فلماذا يأتى احدهم ليخرب ما صنعتة ليجمل مدونتى

ان كان هذا على سبيل التسلية فاطلب منى ان اضع فى هذة المدونة لعبة ما ولتكن شطرنج او اى لعبة فقط اطلبها دون خربشة

سيدى الفاضل

يامن وضعت هذة الخربشات

من فضلك لا تضعها ثانية

وشكرا لحسن تعاونك

دخن . دخن ... محدش واخد منها حاجة

الفيديو دا جايبة من مدونة عصفور المدينة

بجد الفيديو دا يخوف جامد جدا

للمدخنين وغير المدخنين واللى لسة بيتعلموا

وطبعا المدخنين هيحاولوا يتحايلوا على الفيديو ويقولوا ان ظروف التجربة غير ظروف الشرب الحقيقى

لكن انا هقول ان دول 400 سيجارة وانت لو مدخن بقالك سنة وبتشرب سيجارة واحدة فى اليوم يعنى حوالى 365 سيجارة

هيحصلك وبدون مبالغة نص اللى حصل مع التجربة

واترككم فى رعاية الله

صدام " انا لسة فاكرك

الموضوع دا كتبتة من سنة بالظبط

كان يوم عيد الاضحى

وكنت ايامها _على ما اذكر_ بدون فى خدمة جيران

وحطيتة فى منتدى الدى فى دى للعرب

والنهاردة قررت انى اعي نشرة وعلى مدونتى الدائمة ان شاء الله

ــــــــــــــــــــــــــــــــــ

" الزمان : يوم العيد --- بعد صلاة العيد مباشرة
المكان : كل مكان فى الوطن العربى "


محمد : اهلااااااااا ازيك يا "على" ايه اخبارك كل سنه وانت طيب
على : وهبقى طيب ازاى
محمد : ايه ياعم مالك مسودها كدا ليه
على : ايه يابنى باين عليك مش عايش فى الدنيا ولا ايه
محمد : عايش والنهارده العيد والناس كلها فرحانه
على : باين عليك معرفتش
محمد : معرفتش ايه؟ انت يابنى مديها غوامق على الصبح ليه
على : هههههههههههههههههههههه
" ويستمر _على_ بالضحك بطريقه هستيريه "

محمد : بتضحك على ايه , ضحكنى معاك
على : عرفت اول اضحيه فى العيد كانت مين
محمد :!!!!!!!!!! ......... لا معرفتش
" يضحك على ضحكه اخرى مليئه بالدموع "

محمد : ايه يابنى مالك؟ يبنى انت كدا بتقلقنى عليك اتكلم فيه ايه
على : الرئيس "صدام"
محمد : ماله
على : أول اضحيه فى العيد
محمد : انت شكلك شارب ومدروخ
على : لأ والله فايق وعمرى ما هبقى فايق فى حياتى زى النهارده
محمد : انت من الصبح عمال تتكلم ب ألغاز ومش فاهم منك اى حاجه خاااااااااالص
على : الرئيس "صدام اتعدم"
محمد : يااااااااراجل انت بتتكلم جد
على : جد الجد
محمد : وامتى الكلام دا
على : النهارده الصبح
محمد : شكلك بتهزر
على : تعال معايا البيت
محمد : ليه
على : نتفرج على الاخبار
محمد : خلاص مسدقك , بس ليه وفين الحكام العرب
على : كل واحد منهم بيشرب قهوة ساده على روح صدام
محمد : حسبى الله ونعم الوكيل
على : لسه هتقول كل سنه وانت طيب
محمد : انا نفسى اقول كل حاجه فى نفسى نفسى ابعت رساله للرئيس "بوش"
على : يعنى هتقوله ايه
محمد :
" الى رئيس العالم , أشكرك على اعدام العميل الخائن "صدام" وأتمنى منك كرئيس للعالم أن تقدم قربانا كل عام فى نفس اليوم الى ربك وهو أن تضحى بحاكم من حكام العرب "

تـــــمت

البحث عن الزيف

كل يوم تشرق فية الشمس ومن بين خيوظ اشعتها يبزغ لنا فكر جديد , ونرى ما بين مؤيد ومعارض ان هذا الفكر بدأ فى الانتشار ,ان لم يكن على شاشات الفضاءيات او على صفحات المجلات او على اوراق كتب فنجدها فى عقول الشباب , فالكل يبحث عن قدوة او هوية ينتمى اليها ويؤيدها ويحاول جاهدا ان يطبقها على ارض واقعة .

لكن وبالرغم من ذلك نجد ان عقول معظم شبابنا خاوية وان كان يبدو عليهم غير ذلك , ارى ذلك وانا ابحث عن صاحب فكر حقيقى فمعظم من اكلمهم يبدو عليهم الرزانة واللباقة فى الحديث ويبحثون عن شئ حقيقى ينتمون الية او شخصا ينصبونة قدوة لهم , وترى من وجد ضالتة بالفعل وعند ذلك الحد تجد ان ما وجدوة مجرد زيف .

انا لا اتكلم عن زيف ما يعتنقوة او زيف الاشخاص الذين ينصبونهم امام اعينهم ولكنى اتكلم عن زيف رحلة البحث نفسها , فهم لا يعرفون شيئا عن ما يعتنقوة ويجعلون اشياء رموز لهم ل لا شئ .

اضرب مثالا على ذلك ال " تشى جيفارا " وكما قلت انا لا اتكلم هنا عن زيف الاشخاص ولكن عن زيف الاعتناق ولى مع جيفارا الكثير من المواقف التى اقف عليها .

اولها : شاب يجلس بجوارى فى سيارة ميكروباص ومعة حافظة نقود عليها باج بصورة جيفارا تجاذبت معة اطراف الحديث ثم بادرتة بسؤال عن الصورة الموجودة على حافظتة فتعجب ولم يصدق ان لا اعرف ذلك الشخص وعندما اكدت لة انى فى الحقيقة لا اعرف ذلك الشخص _انا بالطبع قرأت بعض الاشياء عن جيفارا من قبل ولكن كان لى غرض من القاء السؤال والتأكيد بعدم معرفتة _فقال لى انة كم يتمنى فى يوم من الايام مثل تلك الشخصية وقال لى ايضا ان صاحب هذة الصورة هو جيفارا فقلت لة وماذا فعل جيفارا لتتمنى ان تصبح مثلة فال لى انة قد نصب محارق لليهود وحرقهم جميعا , وفى هذة اللحظة لم اشأ ان اكمل حديثى معة .

والموقف الثانى : بائع الحافظات نفسة وكنت ابحث وقتها عن حافظة لنقودى ووقفت عندة ووجدت ان معظم الحافظات المعروضة عليها باج جيفارا وعندما سألت عن ثمن احداها فقال لى "25جنية فقلت وبتلقائية امال لو كان عليها صورة غاندى " كانت هتبقى بكام فقال لى انة لا يعرف "غاندى" الذى اتكلم عنة ومن "غاندى " لاساوية بجيفارا فقلت لة متتكلمش عن حد متعرفوش وبعدين جيفارا عمل اية عشان تحبة كدا فقال لى دا عمل ثورة كبيرة فى بلد اسمها "كوبيا " وكانت شخصية دماغها نضيفة , قلتلة اولا اسمها " كوبا " ثانيا يعنى اية دماغة نضيفة معلهاش تراب يعنى فقال لى هتشترى يا كابتن ولا هتهزر فقلتلة شكرا وانصرفت فى هدوء .

وفى موقف ثالث مش عارف لية دخل بموضوعنا ولا لأ بس مفيش مشكلة ان انا اتكلم عنة , كنت راكب مع واحد
صاحبى عربيتة وكان حاطط صورة كبيرة لجيفارا على العربية من ورا ولما سألتة اشمعنى جيفارا قالى صورة روشة مش اكتر .

ومش بس جيفارا لأ فى ناس كتير يعنى فى مرة سألت واحد لابس تيشيرت مرسوم علية صورة ل"بوب مارلى " فبقولة
مين دا فقال لى ان دى صورة مصارع جامد جدا فقلتلة امال مش بيلعب لية دلوقت قالى اصلة بعيد عنك مصاب فقلتلة "الحمد لله" على نعمة الصحة وكتير من العينة دى مثل صور المطرب "ايمينم " وصور "اينشتين " وغيرهم كتير .

فالشباب يبحث عن قدوة يفتقدها بسبب اهمال الاهل لتنمية قدوة سوية فى الشباب منذ نعومة اظافرهم او بسبب سوء البيئة المحيطة وتتعدد الاسباب وتصب معظمها عند الاهل والاصحاب .

ففى زخم هذا البحث يجد الشاب قدوتة فى مطرب او مفكر او رئيس دولة او ينتمى فكريا الى جماعة بعينها او حزب مبنى على اسس هدامة وانا هنا لا اذكر اسماءا فالكل يعرف ولكنى اتكلم عن انتماء الشباب هذة الايام فهو مثل الحبر على الورق او كالندى على الزهر كنسمة باردة فى نهار يوم صيف حار فسرعان ما يصبح كان , فالكل يبحث عن زيف .

العيد فرحة ......مااااااااااااااااااااااااااااااااء

اولا : كل عام وانتم بخير وتقبل الله منا ومنكم صالح الاعمال

ثانيا : انبة علينا جميعا ان العيد عيد الجميع فمن حق الفقراء ان يفرحوا ومن حق كل انسان ان يفرح فى ذلك اليوم

واشدد على اصحاب الاضاحى ان يحاولوا جاهدين ان يوصلوا اضحيتهم الى من يستحقها حقا ولو كان ذلك بشخصهم فهو افضل وذلك لادخال السرور على كل الناس

ثالثا والاهم : لاننسى شهداء المسلمين فى كل بقاع الارض بالدعاء والدعاء لمن هم فى حاجة الى دعاءنا والدعاء للموجودين فى رفح والعراق وفلسطين فالدعاء فى وقت الهرج يكون خالصا فلا ننسى احد

وكل عام وانتم بخير

على هامش مؤتمر انابوليس " العالم ينسى ونحن لا ننسى "

تبدأ الحكاية كلها من عام 1492 بأسطول على السواحل الغربية لاوربا يتكون من ثلاث سفن على متنها 189 بحارا متجهة الى السواحل الشرقية للهند لاكتشاف طرق جديد غير الذى يمر من بلاد المحمدين على حد تعبير قائد الاسطول كريستوفر كولومبس .

كريستوفر كولمبس

لم يكن يعلم البحار كولمبس انه سيجد فى طريقة هذا الكم الهائل من الجزر التى لم تطأها قدم وجمع من هذة الجزر الكثير من الذهب وعاد بها الى اوروبا.وكون اسطولا بحريا مكون من 17 سفينة وبها 1500 بحارا على الاقل ليكمل مسيرة اكتشافاتة العظيمة الى ان استقرت بهم على السواحل الامريكية.

طفل من السكان الاصليون ل أمريكا

والتى كان يسكنا ما يعرفون باسم الهنود الحمر واطلق عليهم هذا اللقب غالبا لان الاوربين كانوا يظنون فى هذة الفترة انهم على احد شواطئ الهند الشرقية.

اسطوتن الاوربيون فى هذا المكان وحاربوا السكان الاصليون من اجل البقاء فى هذة الارض ولم يكن للهنود الحمر ردة فعل قوية لعدم تصدى اسلحتهم لأسلحة الجيش البربرى الاوربى مما اضترهم الى النزوح الى اعالى الجبال او بعيدا عن مرمى اسلحة الجيش الاوربى .

الخريطة الامريكية

اتجة الاوربيون بعد ذلك الى تلك الارض لوجود عوامل كثيرة مساعدة منها الارض الشاسعة وخصوبة الارض وكثرة السواحل فنزح كثير من الاوربيون من اوربا الى امريكا للعمل هناك فمن كان يعمل بالصيد وجد مكانة هناك ومن يعمل بالزراعة وجد له مكان ومن يعمل بالتجارةومن يعمل باى شئ وجد له مكان بتلك الارض الجديدة.

و المنبوذين فى وطنهم وجدوا لهم وطنا جديد وتم استيراد الكثير من الزنوج للعمل بالارض وزراعة التبغ واشتغل الهنود الحمر عند المغتصبون رغما عنهم وكان من لا يعمل يموت وفقا للمقولة الشهيرة " من لا يعمل لا يأكل " .

والان وبعد اكثر من 500 عام اصبح يطلق على تلك الارض امريكا واصبح السكان الاصليون لتك الارض هم من كانوا يغتصبونا من قبل ونسى العالم ذلك ونسى انهم مجموعة من الرعاع والرقيق كانوا منبوذين فى مواطنهم واحتلوا تلك الارض واصبحوا من سكانها.

والان تحاول امريكا ان تجعل من تجربتها الناجحة فى هذا المجال تتكرر وفى ارض عربية .

فمثل ماحدث منذ اكثر من 500 عام يتكرر الان على مرئا ومسمع من العالم اجمع ولما الاستعجاب فهؤلاء من ارسلوا جيوشهم من قبل لتفعل بارض امريكا ما حدث.

لنعيد شريط التاريخ امام اعينكم .

بلفور صاحب وعد من لا يملك لمن لا يستحق

تبدأ الحكاية الجديدة فى مطلع القرن العشرين وكثرة التجمعات اليهودية فى اوربا مما اقلق الكثير من الدول الاوربية وخاصة بريطانيا حيث ان اليهود كانوا قريبين جدا من الدولة البريطانية فوعدت بريطانيا اليهود بالبحث لهم عن وطن وكانت الدولة المنشودة انذاك هى كينيا وكانت مستعمرة بريطانية انذاك واعلنها رئيس المستعمرات البريطانى ان كينيا هى الوطن الجديد لليهود ولكن لاسباب خاصة بالمصالح البريطانية تراجعت عن هذا القرار وكانت فلسطين فى ذلك الوقت تحت الولاية العثمانية وبعد هزيمة العثمانيين فى الحرب العالمية الاولى انقسم الشرق الى الانتداب الفرنسى والبريطانى وفقا لمعاهدة سايكس بيكو وكانت فلسطين غير تابعة لتلك او لتلك بل كانت تحت قوة دولية وفى هذة الاثناء
اعطت بريطانيا لليهود وعد بلفور فى اقامة دولة يهودية على ارض فلسطين مما ادى الى الغاء معاهدة سايكس بيكو وتقسيم الاراضى العربية من جديد وكانت فلسطين من حق بريطانيا وذلك لكى تنفذ وعدها الذى اقرتة عصبة الامم "الامم المتحدة الان" وذلك لحل الازمة اليهودية .وتم فتح باب الهجرة لليهوديين الى فلسطين وتم جلب اكبر عدد من اليهود الى فلسطين عن طريق الهجرة الغير شرعية مما اسفر عن زيادة ملحوظة لليهود فى ارض فلسطين مما اضتر الفلسطينين الى النزوح الى مصر ولينان والاردن وبناء مخيمات للاجئين بهذة الدول.

فى عام 1948وبالتحديد يوم 14/5 وقبل الانتهاء الانتداب البريطانى على ارض فلسطين ب 8 ساعات اعلن رسميا عن قيام دولة اسرائيل دون تحديد اية حدود لها مما يجعل لها الحق فى التوسع داخل الدول العربية وهو ما حدث فعلا اثناء حرب 67 والاستيلاء على سيناء وهضبة الجولان وكثير من المدن الفلسطينية التى لم تطأها القدم اليهودية بعد واقرار البرلمان الاسرائيلى بضم هضبة الجولان رسميا الى الدولة الاسرائيلية المزعومة.

وبعد صدور قرار مجلس الامن 242 والذى ينص على انسحاب اسرائيل من الاراضى التى احتلت اثناء النزاع الاخير_ وهو ما اراة غير عادلا بالمرة لان اليهود ليس لهم الحق من الاساس فى المنطقة العربية _ والتى ترجمت بالانجليزية الى انسحاب اسرائيل من اراض احتلت فى النزاع الاخير وهو ما فسرتة اسرائيل ان هذا التعريف غير محدد المعالم ولم تنسحب اسرائيل من المناطق التى احتلتها .

ومع زيادة عدد المستوطنات الاسرائيلة لا يجد الفلسطينيون السكان الاصليون لفلسطين غير انشاء مخيمات واللجوء بها .

وهذا ما حدث منذ اكثر من 500 عام فى الاراضى الامريكية.

وتريد امريكا الان ان تعيد امجادها السابقة فى محو التاريخ وتجعل من ارض فلسطين ارضا منسية وتسمى بعد ذلك اسرائيل ولكن امريكا نسيت اننا لسنا مجرد هنود حمر او بعض الزنوج التى حملتهم معها لتسخيرهم فى ارضها الجديدة انما نحن رجالا لفحت وجوههم الشمس فلم يعرفوا ذلا
ولا مهانة وانما عرفت امجادا طالت بلاد الغرب كلها وان حاولت طمس ما فعلة العرب فى تقدم العالم وما زرعتة من بذور راؤا حصادها فالعرب هم اساس التقدم وهم من انشاؤا العلوم وكانوا منارة ومطمع لتلك الدول والتى مازالت مطمعا لها رغم تقدمهم .

فهم يعلمون تمام العلم ان عندنا ما ليس عندهم.

والعالم ينسى ونحن لا نسى

صور متعلقة

وعد بلفور

اليهود فى فلسطين عام 48

مخيم عمان بالاردن

مخيم النبطية بلبنان

نزوح الفلسطينيون بعد حرب 67

للمزيد عن الازمة الفلسطينية

يمكنكم زيارة هذا الموقع
فلسطين بالعربية

الدرس انتهى لموا الكراريس

بحبك يا جاهين

...................................................

الدرس انتهى لموا الكراريس


بالدم اللى على ورقهم سـال

فى قصـر الأمم المتــحدة

مسـابقة لرسـوم الأطـفال

ايه رأيك فى البقع الحمـرا

يا ضمير العالم يا عزيزى

دى لطفـلة مصرية وسمرا

كانت من أشـطر تلاميذى

دمها راسم زهرة

راسم رايـة ثورة

راسم وجه مؤامرة

راسم خلق جباره

راسم نـار

راسم عار

ع الصهيونية والاستعمار

والدنيا اللى عليهم صابرة

وساكته على فعل الأباليس

الدرس انتـهى

لموا الكراريس ..

ايه رأى رجـال الفكر الحر

فى الفكرادى المنقوشة بالدم

من طفل فقير مولود فى المر

لكن كان حلو ضحوك الفـم

دم الطـفل الفـلاح

راسم شمس الصباح

راسم شـجرة تفاح

فى جناين الاصلاح

راسم تمساح

بألف جناح

فى دنيا مليانة بالأشبـاح

لكنـها قلـبها مرتــاح

وساكتة على فعل الأباليس

الدرس انتـهى

لموا الكراريس …

ايه رأيك يا شعب يا عربى

ايه رأيك يا شعب الأحـرار

دم الأطـفال جايلك يحـبى

يقول انتـقموا من الأشـرار

ويسيل ع الأوراق

يتهجى الأسـماء

ويطـالب الآبـاء

بالثـأر للأبـناء

ويرسم سيف

يهد الزيـف

ويلمع لمعة شمـس الصيف

فى دنيا فيها النور بقى طيف

وساكتة على فعل الأباليـس


الدرس انتهى لموا الكراريس....................

الحق رجع لاصحابة

من فترة كبيرة وانا جاى اعمل المدونة دى
كان اسمها " احنا وهما " عارف هو نفس الاسم اصبر وهتعرف انا بتكلم على اية
وانا بختار اللينك للمدونة اختارت
e7nawhoma
لكن الموقع بعتلى رسالة وقالى ان اللينك دا محجوز
فاطريت اسفا انى اختار
a7nawhoma
كلكم شايفين الموضوع لحد دلوقت عادى
لكن انا صممت اعرف مين اللى مستخدم اللينك اللى انا كنت عايزة
وطبعا ملقتش حد مستخدمة
وملقتش صفحة باللينك دا
انا ادايقت وقتها لكن المدايقة مش بتنفع
وبرضة المدايقة مخلتنيش اسجل باللينك اللى انا كنت عايزة وقتها

لكن النهاردة وانا بقلب فى السيتينج بتاع المدونة قلت لما احاول اغير فى اللينك واختار اللينك القديم
وبالفعل لقيتة اشتغل فوريا
والحمد لله الحق رجع لاصحابة
وبقى اللينك بتاعى
http://e7nawhoma.blogspot.com/

والقديم كان

http://a7nawhoma.blogspot.com/
بس اللى مدايقنى
هما لية مدونيش اللينك اللى انا عايزة فى وقتها

شركة " اعمار " لا تهتم لمصالح المصريين

كنت اظن ان شركة "اعمار " من الشركات النظيفة

وان لها اسما لا يمكن ان تتخلى عنة وعن نزاهتة

شركة اعمار شركة اماراتية تعمل فى اكثر من دولة

ويثق لها الخبراء فى نزاهتها

وشفافية عقودها مع العملاء

ولكن يبدو ان الحال فى مصر يتغير

فصاحب السمعة الحسنة

لا يريدها فى مصر



وماذنب المواطن المطحون فى مصر
بأن يدفع مبلغا رهيبا زيادة على العقد


من الاخر ومن غير كتر كلام
انا مش عارف اقول اية اساسا فى البلد دى

ادخل على اللينك دا وانت تعرف كل حاجة
ولو مدخلتش
يبقى كأنك مقريتش التدوينة
ونفض لنفسك

http://www.almasry-alyoum.com/article.aspx?ArticleID=82048

القراءة التصويرية

من زمان وانا بحلم انى اذاكر الحاجة بسرعة

اقرا كتاب ميخضنيش

مجموعة كتب زى دى تخض اى بنى ادم نفسة يقراها

لقيت موضوع اسمة القرأة التصويرية فى احد المنتديات

قررت انى اعرف بتحكى عن اية القراة دى

لقيت ان اللى بيتعلمها ممكن يقرا 2500 كلمة فى الدقيقة

بمعدل صفحتين فى الثانية

وفى دورات ممكن الناس تاخدها فى مراكز كتير

ولقيت صفحة فى موقع فيها سرعة قياس القرأة

وقست سرعتى

بس مش هقولهالكم غير لما اعرف سرعتكم

الموقع اهو

ربنا على الظالم والمفترى

هل اصبحنا ننقد لمجرد النقد

معز مسعود

اسم انتشر على قناة اقرأ

كان يدعو للاسلام باللغة الانجليزية

قدم العديد من البرامج الانجليزية

ولكن هذا العام ظهر لنا فى برنامج باللغة العربية ولأول مرة

برنامج الطريق الصح

هو البرنامج الذى قدمة بالعربية

كنت حريصا جدا ان استمع الى برنامجة

جميع حلقات البرنامج على جهازى

من يومين بالظبط كنت قاعد مع واحد صاحبى وقالى من غير مقدمات

انت بتسمع معز مسعود لية

قلتلة بعد ان فهمت مغزى السؤال

لية هو مش عاجبك

قالى مش واجهة اسلامية خالص

قلتلة بيقول حاجة غلط فى البرنامج

قالى لا

بس لبسة وحش

قلتلة اشمعنى

قالى بيطلع بجينز وتى شيرت

وقالى فين الزى النبوى

قلتلة قصدك الجلباب والطاقية والسروال

قالى اه

قلتلة النبى مأمرش باننا نلبس جلباب بل امر بستر العورة وما الى اخرة

طبعا الحوار كان اشد حدة من كدا

بس دا المختصر بتاعة

وموصلش بينا لحاجة لان انا سكت
وهو لما لقينا كبرت دماغى سكت

بس اللى انا عايز اعرفة هو احنا لازم نجادل وخلاص

لازم نختلف عشان نلاقى مواضيع نتكلم فيها

مش عارف

اتجن على كبر

الراجل الكبير بتاع الازهر

او زى ما بيسموة شيخ الازهر

كبر وخرف

فى خطبة ليلة القدر التى القاها قال ان مروجو الاشاعات حكمهم الجلد ثمانين جلدةواستشهد باية رمى المحصنات

إِنَّ الَّذِينَ يَرْمُونَ الْمُحْصَنَاتِ الْغَافِلَاتِ الْمُؤْمِنَاتِ لُعِنُوا فِي الدُّنْيَا وَالْآخِرَةِ وَلَهُمْ عَذَابٌ عَظِيمٌ

والمقصود بالمحصنات من قول شيخ الازهر هو الرئيس مبارك

والحكم عليهم بثمانين جلدة

ولكى عزيزى القارئ ان تبحث فى كل التفاسير عن معنى قذف المحصنات

لكى تعرف ان الرئيس مبارك لا يجوز ان يكون من المحصنين والمحصنات

للمزيد عن الخبر

المصرى اليوم

أخبار العالم

مصراوى

وعن تعريف المحصن يمكنك الدخول للصفحة الاتية

موقع الشبكة الاسلامية

قول للعيد ارجع ياعيد

بجد العيد كل ما الواحد بيكبر طعمة بيتغير

يعنى وانا صغير كنت افرح قوى بالعيدية

بالبدلة الجديدة اللى هلبسها وانا خارج

وانا بعدى على اصحابى انده عليهم اصحيهم

وانا بشترى مسدس "حرب اطاليا" الب بية

ومسدس المية اللى كنا بنخلص علية الخزان

وكان فى مسدس زمان بيعمل شرارة وكان متغطى ببلاستيك

مظنش موجود منة دلوقت خالص

لكن دلوقت وبعد ما الواحد حس انة فى منتصف العمر

مش بيحس بطعم العيد خالص

بعدى على اتنين من اصحابى بصحيهم عشان مروحش لوحدى

بقعد شوية على الناصية اتكلم مع اصحابى

اسلم على اللى رايح واللى جاى

هى دى اللى انا بفرح بيها بس

لما بسلم على الناس

لكن غير كدا كلة عادى

يعنى اللى حصل السنة اللى فاتت هيحصل السنة دى

واللى حصل السنة دى هيحصل السنة اللى جاية

بس النهاردة الصبح وانا داخل اصلى فى النادى اللى عندنا

واحد كبير فى السن اعرفة عديت من جنبية من غير ما اخد بالى منة فقالى هو كل اللى يشترى طقم جديد مبيسلمش على حد

قلتلة الطقم قديم بس باين اللبس اللى عليك جديد

قالى لازم تكون الجلابية جديدة فى صلاة العيد

المهم اللى انا عرفتة واكتشفتة ان اللى فى السن بتاعنا مبيحسش بطعم العيد

الاطفال والكبار بس

وتثبت لنا مصر انها متأخرة على طول الدهر

اليوم الجمعة الموافق 12 اكتوبر يحتفل كل المسلمون فى بقاع الارض بعيد الفطر المبارك

لكن مصر ولكى تثبت لنا انها متأخرة عن الركب

قررت ان يكون العيد بمصر يوم السبت

هذا ولكى تتأخر مصر عن باقى الدول الاسلامية

ولقد حدث هذا بالعام الماضى

واحدث ذلك بلبلة قوية جدا لاختلاف المواقيت بين مصر والدول الاسلامية وبالاخص المملكة العربية السعودية

واحدث هذا الاختلاف فجوة كبيرة جدا فى ميقات عيد الاضحى المبارك

ولكن يبدو ان مصر تريد ان تثبت للجميع اننا الدولة الام ولايجوز ان نسير على ركب باقى الدول

وكل عام وانتم بخير

عندى عشرين سنة بالتمام والكمال

11/9/1987

اليوم دا اول يوم انا اتولدت فية

كان يوم جمعة

واتولدت قبل صلاة الجمعة بشوية صغيرين

والنهاردة انا خلصت عشرين سنة من حياتى

بحاول اشوف حياتى فى العشرين اللى جايين احسن من العشرين اللى عشتهم

على العموم انا مش عايز اكتر من كل سنة وانت طيب

هل سيسجن ابراهيم عيسى وتغلق جريدة الدستور

بالامس ظهرت رسالة جديدة فى برنامج ديبو قارئ المدونات من مدونة انا اخوان بتاع عبدالمنعم محمود بعنوان سكتوووووه بدأ البوست ب " طبعا لازم يتقدم ابراهيم عيسي للمحاكمة وتغلق جريدة الدستور المحرضة المجرمة" وبيتكلم البوست عن انهم ممكن بعد التحقيق مع ابراهيم عيسى يروحوا قافليين جريدة الدستور

التحقيق مع ابراهيم عيسى عشان الاشاعات اللى طالت الرئيس واللى بيقولوا ان الدستور نشرتها

طب فين الاشاعات اللى عملتها الدستور

ولو فى اشاعات يبقى الدستور صاحبتها

مع ان الدستور جريدة معارضة بس حيادية ودى معادلة صعبة ان حد غير الدستور يعملها

مينفعش جريدة زى الدستور تتقفل باى طريقة من الطرق

جريدة الدستور افضل جريدة يومية واسبوعية

هى فيها كام صفحة ملهمش لازمة بس مينفعش تتقفل

وانا عن نفسى مش بقرا غيرها واحيانا المصرى اليوم

واحنا لازم نعمل حاجة

وقع من أجل التضامن مع إبراهيم عيسي

تغيير الساعة ورمضان

عن تغيير الساعة فى مصر اتكلم

عن شكلنا اللى بقى وحش

كل سنة يغيروا الساعة فى اخر شهر 9 تسعة

ولما حبوا يغيروا الساعة السنة اللى فاتت لقييوها هتدخل فى رمضان

راحوا مقدمينها قبل رمضان

ولما السنة دى لقيوا تغيير الساعة هيبقى فى نص رمضان راحوا مغيرين الساعة قبل رمضان باسبوع

هو احنا مش هنصوم على التوقيت الصيفى لو فضل زى ما هو

هو التوقيت الصحيح لمصر هو التوقيت الشتوى

يارب السنة اللى جاية متتغييرش عن التوقيت الشتوى

وهفضل اسال امتى هتفضل الساعة فى مصر ثابتة؟؟؟؟؟ يلا

امساكية رمضان للسنة دى بالساعة الجديدة

ريم بنا وصوت لن تسمعة الا منها

ريم بنا من الاصوات التى لها طابع خاص واسلوب غنائى خاص

تغنى للطفولة وللحرية ولفلسطين وطنها

فل نسمع لم تكن تلك حكايتى

تاج لذيذ جدا

فكرة تاج جديدة جدا من عند
مبرمج حر

والتاج دا انا شايفة بداية
لنوع جديد من التاجات اللى بتهدف لحاجة

خلينا مع التاج

مررة لى الاستاذ صاحب مدونة عصفور المدينة
غنى عن التعريف طبعا


لما
أحب أتابع أخبار التكنولوجيا وأخبار
العالم بفتح

شبكة الاخبار العربية محيط
محرك بحث جوجل



لما أحب ألعب على الكومبيوتر

انا عن نفسى بحب لعبة call of duty نداء الواجب



لما أحب أقرأ مقالات إسلامية حلوة
واسلوبها ممتع

طبعا طريق الاسلام

ومدونة عصفور المدينة

لما أحب أكتب ..

عن اى حاجة بس اكون فعلا حاسس بيها واحب اكون مميز فى
الكتابة



لما أحب أطبخ ..

لما بدخل المطبخ ودا كتير احب اعمل حاجة محدش يعرف يعملها
غيرى وتكون غريبة



لما أحب أقرأ أدب عالمي

انا بحب اقرا اى حاجة لدرجة ان واحد صاحبى قالى انت نفسك
فى رصيف تبيع علية كتب بس فعلا الواحد بقالة فترة مقصر فى القراءة وعامة بحب القصص
العالمية المشهورة والكتب السياسية

لما أحب اختار قلم :

انا بحب اقلام كتير بس بحب اكتب بالجاف خاصة قلم solo سولو
ودا من شركة بريما

لما أحب أعمل أي حاجة ..

بعملها وخلاص

لما أحب أطلع من حالة غضب أو ضيق أو حزن

انا بحاول افضل هادى جدا او زى ما بيقولوا عليا بارد لكن
لما بدايق مش بعرف اهدى بسهولة

لما أحب أدور على أي تسجيل اسلامي
: أناشيد / شرائط ... الخ ..

طريق الاسلام

محرك البحث جوجل

لما أحب أتكلم ..

بكلم نفسى لان هى الوحيدة اللى بتبقى فاهمانى

لما أحب أتعامل مع الناس

لازم يبقى فى علاقة احترام متبادلة

وكل واحد بيبقى لية حدود

لكن طبعا فى ناس الواحد
بينسى معاهم اى حدود

لما أحب أخرج ..

بحب اروح مكان مرحتوش قبل كدا " وعشان دا مش متاح علطول "فانا بحب اخرج مع اصحابى فى
اى مكان فى جامع على ناصية فى قهوة





لما أحب اقرأ مجلات ..

الدستور الاسبوعى

واحيانا مجلة العربى
الكويتى

لما أحب أمرر التاج

كل واحد يدخل المدونة ومش عندة التاج دا فرض علية

youtubeتحميل سهل وسريع من ال

طبعا كلنا عارفين اشهر مواقع عرض الفيديو اونلاين وهو ولا اية

وبتقابلنا مشكلة كبيرة لما يعجبنا الفيديو ونحاول ننزلة ندخل على مواقع ونجيب برامج ونقعد نفتح فى حاجات ونقفل فى حاجات تانية



من كام يوم واحد قالى على طريقة للتحميل من هى مش مشهورة جامد لكن هى اسهل الطرق اللى قابلتها فى تاريخ حياتى وعشان هى سهلة هحاول انفعكم كلكم بيها وهشرحها ولو ان شرحى مش هيضيف كتير للطريقة بس يلا خليها عليكم المرة دى

الشرح

اولا : تفتح صفحة الفيديو اللى انت عايز تنزلة

kissثانيا : تيجى عند اللينك بتاع الصفحة وتضيف كلمة

enter فى المكان اللى هقولكم علية فى الصورة اللى جاية وبعدين تدوس

طبعا كلنا ملاحظين اللينك اتغير ازاى واللوجو بتاع الموقع بقى شكلة عامل ازاى

Download ثالثا : هتنزل فى الصفحة تحت لحد ماتلاقى كلمة

save target as متدوسش عليها كدا عادى وتستنى تحمل لا دوس كليك يمين وبعد كدا اختار

واختار المكان اللى انت هتحفظ فية الملف

save استنى اوعى تدوس

غير اسم الملف للاسم اللى انت عايزة

save ياعم استنى قلتلك متدوسش

.flv وفى اخر اسم الملف اللى انت عاملة زود انت الامتداد وخلية

save حلو كدا وممكن تدوس

الصور الخاصة بالخطوة رقم 3

وبعدين تدوس كليك يمين وتختار

وبعدين سمى الملف زى ما انت عايز وغير امتدادة بس

واهم حاجة تغير الامتداد

وبكدا اقدر اقولك 1000 ملوين مبروك عليك

الملف بقى عندك

Media Player Classic دلوقت عندك الفيديو بالامتداد الغريب دا وهيشتغل على جهازك ببرنامج

windows Media Player ودا هتلاقية على جهازك فى النسخة بتاع الويندوز جوا برنامج

لكن ممكن تغير الامتداد بتاعة الى اى صيغة فيديو انت بتحبها ودا ببرنامج تحويل لصيغ الفيديو

كل سنة واحنا مدونين

ايام قليلة ويهل علينا هلال شهر رمضان الشهر الذى ينتظرة كل مسلم فى كل قطر فى الارض وهذا العام مميز بالنسبة لى فهو اول عام يمر بى وانا مدون رغم انى بدأت التدوين فى اوائل 2006 الا اننى بدأت من جيران ثم البلوجر ثم هجرتة لصعوبة التعامل معة ثم انتقلت الى مدونة على مكتوب وكنت قد قررت الاستمرار بها الا اننى وبالصدفة قد دخلت الى حسابى فى البلوجر ووجدت ما قد ال الية بلوجر من تحسينات رهيبة جدا لذلك عدت اخيرا الى بلوجر بهذة المدونة واتمنى من الله ان استمر بها وان يعيد الينا رمضان القادم وانا مدون

وكل سنة واحنا مدونين

ويحك يابلوجر

بقالى حوالى 4 ايام وانا متعذب من البلوجر

تدق الساعة 11 بالليل وميفتحش خالص

مش عارف من اية

ياريت لو حد يعرف حل

ومش البلوجر وبس

لا معظم المواقع مش بتفتح بالليل

ياريت لو حد يعرف ممكن يكون اية السبب

طبعا ممكن واحد يبص على معاد التدوينة دى يلاقيها بالليل ويقول عليا بشتغل الناس

لكن انا هقولة ان انا بكتب التدوينة دى ومش هشوفها نزلت ولا ومش عارف اساس هتنزل ولا لا

العودة لكن فى النفس شئ

الغياب مكنش لسبب انى كنت نويت ابطل تدوين

ولا عشان عايز ابعد عن التدوين شوية عشان استريح

بل بالعكس التدوين من اجمل حاجات الواحد بيعملها فى حياتة

لكن البعد عشان حلم كنت مستنية يتحقق

وانا كنت مسميها فترة غياب مش انقطاع

المهم الحلم متحققش والحمد لله على كل شئ

لكن لما الحلم ضاع ساب شئ فى نفسى مش عارف اعبر عنة ازاى غير انى اقول ان فى حاجة فى نفسى

ومع مرور الوقت الواحد لازم يبنى حلم جديد ويحاول يحققة حتى لو محصلش نصيب يبنى حلم جديد المهم انة ميبطلش يحلم

مش هقولكم قد اية الواحد بيستفاد من كل تجربة بيعدى بيها "دا لو كان عايز يستفاد "لكن لو مكنش عايز يستفاد يبقى طريق وبيخلص ومش مهم هو وصل لاية

نهايتة ان احنا عدنا

نقابة الاطباء وفلسطين والسلك اللى فى الحمام

كنا فى مؤتمر عن الانتفاضة الفلسطينية انا وابويا فى نقابة الاطباء

كان عندى وقتها حوالى 15سنة

ووصلنا متأخريين ولحسن حظنا كان فى فى الدور التانى شاشة عرض كبيرة وكانوا موصلين الجهاز بسلك فى فيشة الحمام

المهم قعدنا بتاع نص ساعة وقلت لابويا هروح ادخل الحمام وانا خارج من الحمام رجليا شدت السلك اللى فى الفيشة وشاشة العرض فصلت وكلة حاول يشغل الجهاز تانى ومحدش عرف يشغلة وكل الناس اللى فى الدور التانى كلها مشيت من غير ما تكمل المؤتمر

المهم انا بعترف النهاردة ان انا اللى عملت كدا لان مفيش حد عرف ان انا اللى عملت كدا ولا حتى ابويا

غياب

طبعا كلنا فاكرين الكلمة الخالدة

غياب

واحنا قاعدين فى الفصل كل استاذ يدخل علينا يمسك الدفتر ويقعد ينادى فى الاسامى اللى مكتوبة فية ولما حد يكون مش موجود يروح الفصل كلة يقول غياب

مش المشكلة دلوقت فى ان الاستاذ كان بيخلص الحصة كلها فى المنادية على الطلاب اللى ميعرفش اسم واحد فيهم

ولا المشكلة فى ان احنا دخلنا المدارس زى ما خرجنا

المشكلة دلوقت انكم هتوحشونى لفترة صغيرة جدا مش هقدر ادون فيها

كلها اسبوعين وبس

وراجع

55يوليو

كانت
بداية يوم لطيفة لنهاية محيرة , بدأ اليوم بدعوة صديق لى على الغدا فى ذكرى
الثورة.

اتغدينا
وشربنا الشاى وفتحنا التلفزيون وكان معظم القنوات المصرية حاطة لوجو مكتوب علية
"55يوليو" لكن كان فى قناة كاتبة الكلمة اللى فى اللوجو باللون الاحمر
وكانة بينزف دم ,وكان معروض عليها فيلم الخطايا والفيلم شدنا لحد الاخر , وانا عن
نفسى بموت فى الفيلم دا , وبعد الفيلم ما خلص سألت صاحبى هو فيلم
"الخطايا" مين اللى مثل فية؟!؟!؟!

كان
بيحسبنى بهزر وراح ضاحك جامد ,قلتلة ان انا بتكلم جد "مين اللى مثل فيلم
الخطايا" ؟ رد عليا وهو مستغرب عماد حمدى وحليم , سالتة سؤال تانى ,طب
والفيلم دا بيتعرض فى ذكرى الثورة لية ؟ قالى طب وانا مالى هو انا صاحب القناة؟
قلتلة طبعا لا دا انت كحيان وشارى التلفزيون قسط بس اكيد الفيلم دا بيتعرض
النهاردة لسبب بس اية هو!!! مش عارف ,قالى انت غريب النهاردة قوى يا عم ماتكبر
دماغك ,قلتلة حاضر بس جاوب على سؤال اخير هو مين صاحب القناة دى؟

قالى
"فلان الفلانى" قلتلة مش دا اللى اعتقل من عشر سنين وهو كان ماشى فى
مظاهرة ؟ قالى هو وكمان اللى انت متعرفوش ان الراجل دا ثورجى وكان معاصر للثورة
وكان من اشد المؤيدين ليها.

فكرت شوية
وقلت لنفسى ادام الراجل دا ثورجى يعنى لازم يعرض افلام وبرامج عن الثورة خاصة فى
اليوم دا , واكيد لما يعرض حاجة فى اليوم دا يبقى ليها دعوة بالثورة.

قلت فى
بالى يمكن عماد حمدى كان من الظباط الاحرار ؟طبعا مش ممكن , طب ممكن عشان حليم كان
صوت الثورة؟ ممكن _كل شئ جايز_ وفى اللحظة دى سمعت صوت صاحبى بينده عليا وبيقولى
اللى واخد عقلك انت رحت فين , قلتلة ما انا قاعد جنبك اهو , قالى انت بقالك خمس
دقايق سرحان يابخت اللى انت بتفكر فية , قلتلة بحاول الاقى رابط بين الفيلم
والثورة ,قالى انت لسة بتفكر فى الموضوع دا ,دا انا نسيت ان احنا شفنا الفيلم
اساسا , ياعم كبر دماغك .

جاتنى
فكرة حسيت انها هى الخيط اللى هيوصلنى للحل ,قلتلة مش صاحب القناة ثورجى ؟ قالى
ايوة , قلتلة وكمان معارض لمبارك ؟ قالى ايوة وبعدين!!!؟

قلتلة هو
مبارك قال اية عن الثورجية والثورة ؟؟؟

قالى
ياسيدى انت شاغل نفسك بكلام لا هيودى ولا هيجيب , قلتلة بس جاوبنى وريحنى وخدنى
على قد عقلى ,قالى انا مش فاكر غير انة قال انة بيتبنى مبادئ الثورة .

فكرت شوية
كتار وبدأت اعيد الفيلم فى دماغى ولحد المشهد العامى بتاع القلم والكلمتين
الجامدين بتوع " انت مش ابنى , حسن يوسف هو اللى ابنى ,اطلع برة " وسرحت
مع المشهد .

_فاكرين
العالم اللى خرج من البانيو يجرى عشان يقول للناس "وجدتها وجدتها"

انا كنت
حاسس ان انا العالم دا وصرخت بعلو صوتى "وجدتها وجدتها" صاحبى بصلى
باستغراب وقالى انت عبيط يابنى هى اية اللى وجدتها ؟؟؟!!!

قلتلة انا
لقيت الرابط بين الفيلم والثورة , قالى طب ما تقولى يافكيك اية الرابط دا .

قلتلة
عماد حمدى هو حسنى مبارك , راح ضاحك جامد , قلتلة اكمل ولا بلاش خالص , قالى كمل ,
قلتلة وحليم هو مبادئ الثورة , ولما عماد حمدى _اللى هو مبارك _ حس ان حليم _اللى
هو مبادئ الثورة _خطر علية وعلى عيالة راح ضاربة بالقلم وقالة على الحقيقة ان مش
ابنة وانة لقيه فى التاريخ وانة كان متبنية لكن هو دلوقت مينفعش يبقى ابنة وراح
طردة برة بيتة وبرة دماغة كمان ومرضيش يتبنى حد تانى واكتفى بافكار عيالة .

"ملحوظة : مفيش اي
حاجة من دى حصلت والحاجات دى تخاريف بس"

تاج بس مش فوق دماغى

اول تاج ليا من ايمان صاحبة مدونة التهمة مصرية

انت مين ؟

انا محمود انسان عادى بيحاول يوصل
للى هو عايزة ونفسة يشوف بلدة اجمل بلد فى الدنيا

مين اكتر ست شخصيات بتحبهم؟

هو السؤال انا شايفة غلط ومينفعش
اجاوب علية

لان انا عندى ابويا وامى ودول اتنين

واصحابى الانتيم ودول اربعة

واخواتى اللى انا بموت فيهم ودول
خمسة

خمسة وخميسة

ههههههههههه

يعنى انا معرفش ارتب ست شخصيات
بحبهم اكتر من شخصيات تانية

لانى بالشكل دا هكون ظالم لشخصيات
كان نفسى اكتبها

انت سعيد؟

دا بيقف على معنى السعادة

يعنى السعادة مش دايمة

والحزن مش دايم

يعنى ممكن ابقى ماشى فى الشارع
واكون مدايق وفى وسط ما انا ماشى العب مع طفل صغير وابقى سعيد فى لحظتها

يعنى معنى السعادة دى شئ متفاوت

لو اجتمعت انت وحسنى مبارك فى غرفة
واحدة هتقولوا اية ؟

ربنا على الظالم والمفترى وابن
الكلب

وهقولة احنا زهقنا انت مزهقتش

لو معاك مليون ونص هتعمل بيهم اية ؟

لو
كنت كسولى فى الفترة اللى هتجينى فيها الفلوس هحطهم فى البنك واعيش على فوايدهم

لكن
لو كنت فى حالة تاهلنى ان انا اشتغل هعمل شركة صغيرة

ومحدش
يسالنى عن اية عشان دا سر

بتحب مصر ؟

مصر وان جارت على عزيزة

بتحب البنات ؟

صراحتا

اه

بس
دا شئ فطرى فى كل البشر

اية اكتر موقف محرج اتعرضت لية ؟

هى
مواقف كتيرمنها ان انا فى يوم دخلت اسلك خناقة وقلت للشباب اللى كانوا بيتخانقوا
ان الاسلوب دا اسلوب ضعيف ومينفعش نستخدمة لان احنا كبار والحاجات دى احنا كبرنا
عليها وفعلا الخناقة وقفت لكن لما واحد قال ستووووووووووووب اللى داخل اللوكيشن
يطلع برة

طبعا
كلكم عرفتوا ان الناس اللى كانوا بيتخانقوا كانوا بيتخانقوا لية

اية اكتر امنية نفسك ربنا يحققهالك ؟

افتح شركة الكترونيات

وامسك حكم مصر

تمرير التاج

لكل مدون يدخل يقرا التاج

ولكل واحد نفسة يبص لنفسة فى المراية