حدثنى شارلى - 2

جلسنا فى اعلى قمة جبل فى العالم

نحتسى اكواب الشاى الملتهب

بدا مبتسما طول الوقت ضاحكا احيانا

وعندما سألته عن سر ضحكه

اجابنى

لا سبب

الضحك مفتاح الحياة

تخيل حياة بدون ضحك

لما الحياة اذن

باغته بسؤال ربما احرجه بعض الشئ

لكنه كان على يقين بانه يعرف الاجابة

لايجب عليه ان يفكر فى اجابته

قلت له ولكنك تبدو حزينا معظم الوقت ؟؟؟

نعم ابدو حزينا ولكن حزنى دائما مايخرج ضحكة صافية من قلب كل من يرانى

قلت له هذا صحيح .. ولكنه عجيب ايضا .. كيف ذلك ؟؟؟

اجابنى بأنه عندما يتخطى الحزن اقصى درجاته ولا يستطيع البكاء ان يعبر عن شدته

يصبح الضحك هو المنفس الطبيعى لحزنك

كان يقصد ان حزنه قد تخطى جميع مراحله السهلة والصعبة وبدا بلا حدود

وتفهمت ذلك

ولكنى قلت له ولكن حزنك يسعد غيرك ولا يسعدك

قال لى انا سعيد

ربما تقاسيم وجهى لا تظهر ذلك

فتقاسيم وجهى ظاهرة وتحزن للحزن الظاهر

ولكن قلبى باطن يسعد بعمق

اقنعنى منطقه

ربما الحزن بتقاسيم وجوهنا حزنا ظاهرا وان سعادة غامرة تغمر قلوبنا

وربما العكس

ان ملامحنا السعيدة مجرد ظاهر

وقلوبنا تعيسة بشكل اكبر

ولكنى لا اترك فرصة لاساله الا وسألته

قلت له ولكن ما هو الاختيار الذى يجعلنا سعداء او تعساء مادامت قلوبنا هى الاهم فى احساسنا بالسعادة والحزن

صمت كثيرا محدقا فى السحاب المار اعلانا بقرب ووضع يديه بوسط سحابة كانه يقسمها نصفين

وقال لى الشخص الوحيد القادر على الاختيار

انت

حدثنى شارلى - 1

دائما مايجلس امامى

فأطيل النظر اليه وادقق النظر

اتفحص عينيه لعلى اجد شيئا يخفيه بداخلها

لعلى اجد سرا اخبر العالم انى وحدى من اعرفه

اتفحصه كاملا

عينيه .. قبعته .. ملابسه .. حذائه .. شاربه الصغير

هو عكسى تماما

لاينظر الى شئ .. هادئ

يحاول الا تفضحه عينيه ويخفى مايريد ان يخفى ويخبرنى ككل المرات

بما يريد هو ان يخبرنى

اليوم وعلى غير عادته لم يخبرنى شيئا

كانه لايريد ان يتحدث فى اى شئ

يديه معلقتين بعصاه

مقعده الخشبى مائل الى الخلف قليلا

فى حالة من الاتزان

ساكن

عيناه مغلقتان بهدوء

وكأنه يودع الدنيا

او يتأمل اللا شئ

انتظر ان يخبرنى اى شئ ان يحدثنى وطول الانتظار يقلقنى

انتظر وانتظر وانتظر

وهو ساكن كهدوء لاعبى اليوجا

ناديته

شارلى

عدل من وضعية كرسيه بهدوء

ونظر الى وقال

اعلم

تريدنى ان اتحدث .. ان اخبرك مالم اخبر احد اخر به

لم يكن هذا مايخطر فى بالى حينها

كل ما اردت معرفته

بماذا كان يفكر

ولما على غير عادته جلس هادئا

اخبرته هذا

فقال لى اولا تريد سرا

قلت له اريد

ولكن اريد معرفة سر اليوم

سر هدوءك المفاجئ

قال ساخبرك الاثنين

هدوءى اليوم لانى اردت ان اخبرك سرا لايعرفه احد سواك

وكنت افكر بأى الاسرار اخبرك

وقد قررت ان اخبرك عن سر لايعلمه الا الله وانا

وانت بعد قليل

وبدا يقص على سره

واستمعت اليه

اخبرنى شيئا ادهشنى

اخافنى .. صدمنى .. اسعدنى .. اقلقنى .. ادخلنى بدوامة مليئة بالاحاسيس المختلطة

الاحساس وضده

لا ادرى كم مضى من الوقت لأستوعب انه قد تركنى وحيدا فى حيرتى

لا اتذكر ابدا

هل قال لى وداعا

ام انه تركنى دون تحية

ولكن ما اتذكره جيدا

انى وعدته الا اخبر احدا بسره

احاسيس وعيد

ستى انا بحبك

ستى عمرها اضعاف عمرى

مش مجرد ست عجوزة وبس

دى عمر

دى قلب

دى باب للسما

تعرفى انك عمرك مادعتيلى لحاجة ومحصلتش

دا بجد

كل مرة تدعيلى بيبقى باب السما مفتوح

ببقى مكسوف قوى لما اقعد فترة مشوفكيش فيها

وادخل عليك

وتقوليلى بدعيلك من غير ما تيجى

واقولك انى جاى اسلم عليك بس

وتصدقينى

ولما اقولك ادعيلى بقى يحصل كذا بتدعى

وانت مصدقه انى جاى عشان اسلم عليك

كنت مبسوط قوى لما دخلت عليك

وقلتيلى انك بتدعيلى علطول

ولما خالى دخل وقالى 1000 سلامة

انت عامل ايه دلوقت

واتخضيتى عليا

وقعدتى تحلفيلى مليون مرة

انك متعرفيش

وان امى مقلتلكيش

وانا اقولك يا ست انا زى العفريت اهو

وجيت لحد عندك

وان انا مش تعبان

وبرضه تقتنعى بكلامى

تعرفى يا ستى ان انا كان نفسى تدعيلى

وانى مكنتش بعيد عليك بس

بس مقلتلكيش

طيب تعرفى انى بحبك قوى قوى قوى

وانى ببقى مبسوط قوى لما ادخل واخدك فى حضنى

او تاخدينى فى حضنك

ستى

انا مبحبكيش تبقى متضايقه لما حد من العيال يضايقك

وببقى تعبان قوى لما ابقى مخضوض عليك

ستى

انا بحبك

خالتى الله يرحمك

انا اسف جدا

انى محاولتش حتى ازورك فى المستشفى قبل متموتى

وكنت عارف انك هتموتى

بس مكنتش هقدر اشوفك بشكل مش هقدر انساه

شكل يخليكى علطول فى بالى وانت صعبانه عليا

كان نفسى تفضلى خالتى اللى بتحكيلى حكايات لما ابقى نايم على سريرك

وبتغنيلى

تعرفى ان مفيش حد حكالى حكايات ولا غنالى من بعد مارحتى عند ربنا

تعرفى ان فى اغنية لما بسمعها بفتكرك علطول

بفتكر اوضتك

السرير

اللمبة اللى مطفية

وشك المنور

تعرفى انى مقتنع انك ملاك عمره اقصر من عمر البشر

وحشتينى

اخويا وعيال عمى الصغيرين

اى نعم بتبقوا احيانا ارزل من الرزالة

بس مكنتش عارف هعيد ازاى لو مندهتش عليكم الصبح اصحيكم

كان صباحكم احلى صباح فى احلى عيد فى الدنيا

احمد وهو بيقولى انه صام يوم الوقفة

مع انه ميعرفش عن الصيام اكتر من انه مياكلش وميشربش

بيتهيالى انه لو كل حاجة بعيدا عن الفطار هيفتكر انه كان صايم

لانى عرفت من يوسف اخويا انه اكل شيكولاته الصبح

رضوى ورفيدة التوءم اللى مش شبه بعضه خالص

لافى الشكل ولا فى المضمون

الشبه الوحيد اللى بينهم

انى بحبهم

كنتوا قمرين فى سما واحدة

يوسف اخويا الصغير اللى بقى ألعب منى فى الفيفا

بقولك

هكسبك يعنى هكسبك

البنت الصغيرة اللى كانت على كتف باباها اللى انا معرفهوش وانا راجع من صلاة العيد

وطلعتلها لسانى

وبكل تلقائية طلعت لسانها وضحكت

ربنا يخليك لباباكى

الناس اللى عيدت عليا

شكرا

الناس اللى عيدت عليهم

عفوا

الناس اللى زعلانه منى

متزعلوش

الناس اللى مبسوطه منى

اى خدمة

الناس اللى عدى عليهم العيد وهما زعلانين

عشان عندهم حالة وفاة

البقاء لله

والعيد اللى جاى يبقى كله فرح

الناس اللى عدى عليهم العيد وهما زعلانين

لاى سبب من الاسباب

مسيرها تروق وتحلى

البنت الرفيعة اللى طول المكتب بتاعى اللى شاورتلها النهاردة

انتى شبه البنات اللى فى افلام الكرتون

:)

واخيرا

لكل الخرفان والعجول والجمال اللى اتدبحوا عشانا فى العيد

احب اقولكم

شكرا

:)

السحرة

ان تكون مدعوا لمشاهدة عرض مسرحى فهذا جيد ولكن السئ فى الامر ان تصاب بالاحباط بمجرد دخولك ساحة العرض وتزيد حالة الاحباط تدريجا بانتظارك لبدء العرض فيما يزيد عن الساعة والنصف.
مسرحية السحرة للكاتب محمد ابوالعلا السلامونى والتى تخرجها منى ابوسديرة تعرض حاليا تحت اشراف الهيئة العامة لقصور الثقافة فرع ثقافة الجيزة واذا تم ذكر قصر الثقافة لك ان تتوقع شكل القاعة المسرحية والتنظيم التى ستحظى به المسرحية .
المسرحية تعرض فى نادى الطالبية الرياضى ولا اعلم ما مدى التوافق بين الرياضى والعرض المسرحى ,
اذا وصفت لك شكل المسرح والاضاءة والجو المفتوح تحت السماء مباشرة وعلى كراسى كافتريا النادى وخلفية المسرح الزرقاء التى لا تصلح لان تكون "فراشة _بكسر الفاء _ فى عزا" والسماعات عديمة الفائدة وصوت الاطفال وتزيق الكراسى فى الارض والاضواء الكاشفة ولك ان تتوقع ان المسرح بدون ستااااااااااار.
ان تسمع ستوب فى عرض مسرحى فتلك قمة التراجيدا
ان يتوقف العرض لمدة نصف ساعة لتصليح السماعات فتلك مأساة
بينى وبينكم انا زهقت من اللغة اللى انا بكتب بيها
انا هكتب زى ما انا عايز وزى ما انتوا هتقروا

المسرحية بها الكثير من الاستعراضات معظمها جيد
موسيقى تصويرية واغان رائعة جدا
تمثيل تحس ان نص الممثلين خايفين
اضاءة فى المكان اللى وصفتة اقدر اقول عليها عشرة من عشرة
ازياء جميلة جدا

بالنسبة للاستعراضات اللى انا عرفته انها اتعملت بشكل مش احترافى
بعنى مش متخصصين عملوها
وكونها تطلع بالشكل دا فهى جميلة جدا
الاغان اللى فى الاستعراضات قوية جدا بس للاسف معرفتش مين اللى بيغنى
الممثلين حاسس ان معظمهم اول مرة يمثل
عجبنى دور حسين وكوكب ومرجانة ومريم وطبعا الاطفال ياخدوا مليون من عشرة والدور اللذيذ جدا دور الوالى
العرض بيتكلم ازاى الطبقة الحاكمة بتستغل اى حدث لتحقيق مصالحها طبعا دا فى القرن ال16 مش دلوقت وازاى السحر معاون دائم للحاكم
وانا ممكن اسقط دا على حاجات كتير دلوقت زى الكورة والاسعار ودا مفعولهم زى السحر تمام

من الاخر ومن غير ذواقة
انا العرض استمتعت بيه جدا جدا جدا
وياخد عشرة على عشرة فى ظل الامكانيات المتاحة والظروف الحيطة بخشبة المسرح
ونصيحة منى ليكم تحاولوا تشوفوا العرض لانه بجد هيفوتكم
العرض بدأ الجمعة 26/3 وهينتهى الجمعة 2/4
العرض بيبقى الساعة 8 م
حاسس ان احنا لازم نقف مع الفن اللى مظلوم
بس

ثوابت

التاريخ عبارة عن وصف الحدث مع ذكر الزمان والمكان وعلشان كدا انا هحاول انى ابقى مؤرخ ....
المكان : شقتنا
الزمان : الساعة السادسة مساء
الحدث :
دقت الساعة 6 وانا بفتح باب الشقة ومكنش فى حد فى الشقة خالص ,دخلت المطبخ ادور على اى اكل , فتحت التلاجة وبصيت على الرف اللى فوق لقيت حلتين فوق بعض كسلت اشوف ايه اللى جواهم لانهم غالبا لسه مستووش لان امى بتجهز الاكل بتاع النهاردة من امبارح بالليل علشان هى ست شغاله ومش فاضيه تطبخ بالنهار لانها بتبقى لسه فى الشغل وللسبب دا مفتحتش الحلل , الرف اللى تحتيه فيه علبة حلاوة طحينية وانا مش بحبها وجمبها علبة مربى بلح صفيح مقفولة مسكت العلبة وخرجتها برة التلاجة وقعدت ادور على الفتاحة بس مفيش اى فايدة فدخلتها التلاجة تانى وقررت انى اعمل سلطة خضرا أهو منها حاجة بردا تبرد صدرى من الدخان اللى عمال اشربة طول النهار ومن صداع النيسكافية البلاك اللى شربته بمعدل ماج كل ساعة علشان افضل فايق طول ما انا فى الشغل , اصل انا بقالى كتير منمتش ومش هكدب عليكوا لما اقولكوا انى فعلا معرفش بقالى قد ايه منمتش لانى هموت فعلا من قلة النوم ومش قادر افكر من صداع العربيات ودوشة البنى ادمين وزغللة شاشة الكمبيوتر اللى فى الشغل .
الطبق قدامى على السفرة وجواة المعلقة وانا ببصلهم باستغراب , شايف الطبق السرير والمعلقة المخدة بتاعتى , ممكن علشان مقتول نوم ومهلوك صحة والنوم هو الحاجة الوحيدة اللى ممكن تريحنى وفى نفس ذات الوقت مينفعش انام وانا جعان علشان مفيش حاجة تنغص عليا نومى , وحتى كمان كل مايزيد التعب كل ما متعتى فى النوم تكتر زى مالناس بتقول .

الساعة 7 فى نفس المكان ع السفرة

امى دخلت ومعاها اخويا لانهم شغالين فى نفس المكان وطبعا حماتهم بتكرهم لانى كنت خلصت الطبق , خمس دقايق وامى دخلت المطبخ واخويا الممل دخل ياخد دش علشان يمارس هوايته المملة .

الساعة 7:30 فى الاوضة بتاعتى انا واخويا

اخويا قاعد ع المكتب بيقرا فى كتاب مقدرتش اقرا اسمه من الزغلله اللى كانت فى عنيا بس الحمد لله قدرت احدد لون الكتاب اللى كان لونه شبه السجادة اللى مفروشه تحت المكتب , معرفش اسم اللون دا ايه لانى مبعرفش فى الالوان مع انى شغال مصمم مواقع يعنى لازم اكون عارف الالوان بطبيعة شغلى , بس انا بصمم زى ما انا شايف الالوان ومدى تناسقها مع بعض .

الساعة 8 فى الاوضة

انا نايم على السرير واخويا مولع النور وبيقرا فى الكتاب , عنيا مفتحه وباصص للمبة ومش بفكر فى اى حاجة او مش قادر افكر , محتاج انام ومش عارف اقفل عنيا , طلبت من اخويا يطفى النور علشان اعرف انام فرد عليا بكل رخامة وملل ما انت عارف انى مش بحب اقرا غير ع المكتب ومرحمنيش منه ومن ملله ورخامته غير لما امى ندهت علينا علشان ناكل قلتلهم مش هاكل وحاولت استغل الوقت اللى اخويا بياكل فيه واللى بالتالى النور مطفى فيه فى انى انام وللأسف نفس الموال عنيا مفتحه وباصه للسقف , ملعون ابو التعب اللى يخلى الواحد ميعرفش ينام .

الساعة 10 فى الصالة

قعدت ع الكمبيوتر علشان انزله ويندوز بدل اللى بايظه بقالها مش عارف قد ايه وأهو بالمرة استفيد بالوقت اللى انا مش عارف انام فيه , عملتلى قهوة سادة لونها غامق علشان اقدر افضل صاحى وعملت كمية كبيرة جدا دا طبعا بعد نصيحة الممل ليا بإن القهوة هى اكتر حاجة فى الدنيا كلها هتخلينى صاحى , شربت القهوة وانا بتكلم مع اخويا وامى , ولما بدأت القهوة تخلص حسيت بعنيا بتقفل ومش قادر افتحهم وفضلت اقاوم لحد ما وصلت لسريرى .

الساعة 8 صباحة فى الاوضة

امى بتصحينى للشغل

الساعة 8:15 فى الشقة

قمت وانا زعلان على نسخة الويندوز اللى ملهاش نصيب معايا , وبشكر اخويا على نصيحته ليا بالقهوة , واشكر امى على سندوتشات مربى البلح .

اثر المذاكرة على الحب

اللى بينى وبينك علاقة كونية

زى علاقة الشتا بالبرد

والصيف بالحر

والشجر اللى بيغير ورقه كل خريف

والورد اللى بيفتح كل ربيع

زى علاقة السمك بالبحر

والطير بالسما

واحنا ع الارض

ارتباط شرطى

لما ترمى الخشب على وش الميه

لازم يطفو

ولما تحطى المية على النار

لازم تغلى

اهو انا كدا منفعش من غيرك

ولا انت تنفعى من غيرى

لو كلمتك ع الموت

مش هقول بعد الشر

ما هو ممكن اموت انا وانت

واهى تبقى نهاية سعيدة

لو كلمتك عن المد والجزر

دا اساسى فى الكون

زى ماهو اساسى فى علاقتنا

مرة تشد ومرة ترخى

على فكرة

انا قاعد بذاكر

فى كتاب العلوم

فشلت فشل ذريع جدا

حاولت اكتب موضوع عن الفيلم لكن طلع عك فى عك فى عك
على العموم حاولوا تتفرجوا على الفيلم
واذا كان نفسكوا تشوفوا العك اللى انا عكيته ممكن تحملوا ملف الوورد دا

link 50 first dates