2009/04/07

جامعة المسخرة * القاهرة سابقا


لما تتدخل الجامعة تلاقى دى جى شغال ومش بس كدا تلاقى كمان اغنية انا شارب سجارة بنى وحاسس ان دماغى بتاكلنى
اكيد ساعتها هتحس انك دخلت مكان غلط غير جامعة القاهرة وهتحس ان انت دخلت فرح فى بين السرايات من جوة
وهتحاول تبص فعلا انت فين فى الجامعة ولا فى الشارع
واذا كنت من اياهم هتقف على جنب جوة الجامعة وتبدأ ترووول سيجارة بنى وتشتغل مع الاغنية

الكلام اللى مكتوب فوق مش بيعبر غير عن اللى حصل امبارح فى كلية تجارة جامعة القاهرة تزامنا مع اضراب 6 ابريل
دخلت انا وواحد صاحبى من باب تجارة ورحنا داخليين ساحة الكلية عشان نلاقى دى جى ومعاه 8 سماعات كبيرة والساحة اتحولت للملعب الخماسى المشهور بتاع تجارة واغنية لصفاء ابو السعود شغاله وبتتكلم عن مصر

وطبعا كان فى نصيب لتامر حسنى ملك الجير ومثال الوطنية وشغلولة اغنية ياتاعبنى ياواجع قلبى
اما عن ماحدث فى احدى المدرجات واللى كان بيشرح فيها الدكتور محمد وحيد واللى ميعرفوش يسأل عنه
لما دخل المدرج ولقى ان الدوشة واصلة لجوة المدرج ندة لعامل وقالوا روح قلهم وطوا الدى جى شوية قاله مش هينفع يادكتور فالدكتور قالوا ازاى مش هينفع قاله عشان دى اوامر عميد الكلية

طبعا انا واصاحبى سيبنا تجارة ولفينا الجامعة كلها عشان ندور على المظاهرة اللى فى الجامعة
ولفينا الجامعة وملقيناش حاجة خالص ورجعنا على تجارة ولقينا المظاهرة فى الشارع اللى ورا ساحة كلية تجارة
ولما المظاهرة اتحركت مشيت من جنب الساحة والناس بدأت تتحرك من عند الدى جى والملعب الخماسى وتنضم للمظاهرة
ومشيت واحنا منضمناش للمظاهرة فى الوقت دا قلنا احنا نتفرج على المسخرة اللى فى تجارة
وشوية رحنا للمظاهرة ووقفنا فيها
وبعدين صاحبى سابنى ونزل لناس صحابة فى كلية تجارة وكان قاعد معاهم
وحوالى الساعة 4 سبت الناس معتصميين عند القبة ومشيت وعديت على صاحبى فى تجارة قالى كانت المسخرة اللى شغالة هنا نقصاك
بقوله طب ما انا شفتها
قالى بس انت محضرتش الاغانى الشعبية واغنية سجارة بنى

طبعا مظنش ان انتوا محتاجين تعرفوا اى حاجة حصلت بعد ماعرفتوا ان اغنية سجارة بنى اشتغلت
ومش عايزين تعرفوا حاجة بعد ماعرفتوا ان الاوامر كانت بتيجى لبتاع الدى جى من الامن وعميد الكلية

5 comments:

مهندس مصري said...

هي وصلت لسيجارة بني
عليه العوض و منه العوض

Abdou Basha said...

فعلا حاجة مسخرة
جميل انك قادر تستغرب

سوبيا said...

الحمد لله
عالجهل والجدعنة

OPTIMESTIC said...

:(

بنبسط لما الاقي ناس بتلاحظ ....

معتز شاهين - باحث تربوي said...

ياسيد ممدوه انا مش عارف الحكومة ترديكم بأيه
مش روقتلكم الجامعة عشان أوباما
عايزين اكتر من كده أيه

تحياتي على ذلك البوست المفيد وعلى المدونة الهادفة

واعتذر عن اختياري لنفس اسم مدونتك لمدونتي ولكن عذي أن ليس لي سابق معرفة بمدونتكم الكريمة
وفي الآخر أنتم لكم السبق .. فأنت من السابقين

تقبل تحياتي
ويبقى التواصل