2008/12/05

اكتشاف المخ


زمان كنت فاكر ان المصريين عندهم حاجة اسمها عقل لكن بدأت اشوف حال المصريين بتمعن وعن قرب لقيت ان دماغهم مش جواه عقل جواه حاجة اسمها مخ
واحد هيتنح وممكن يتف على الشاشة اللى قدامة ويلعن اللينك اللى جابوا هنا او محرك البحث جوجل اللى دايما بيحشرنى فى كل حاجة عنده وهو بيقولى ايه الفرق يا خفيف بين العقل والمخ ؟
وبصراحة انا كنت زيه بالظبط معرفش ايه الفرق بالظبط
كل اللى اعرفة ان الاتنين جوا الدماغ
ممكن يسالنى طب واية الفرق بين الدماغ والعقل والمخ ؟
هقولك ما انا كنت زيك كدا فاكر كلهم حاجة واحدة
لكن اكتشفت اخيرا ومؤخرا ان فى فرق كبير بين التلاتة اللى بنتكلم عنهم _ ربنا يسامحنا اذا كنا بنتكلم فى غيبتهم _ قال ايه الدماغ مش هو العقل ولا هو الخ
بداية الاكتشاف لما دخلت مسمط جميل كدا وعلى قد حالة ارضية ترابية وسقف مغطى بخوص وحيطة متبيضة بحصر قش وطلبت واحد عقل _ بصراحة هى الكلمة اللى جت على لسانى كنت ناوى اطلب مخ لان هو دا اللفظ اللى يعرفوه
رد عليا الراجل بكل هدوء : عقل حضرتك جاى تهزر ولا جاى تاكل ولقيت صوتة على فجأة رد عليااااااااااااااااااااااااااااا
بسرعة
قلتلة : قصدى دماغ
مشى من غير ما يبص عليا وقالى وهو مدينى ضهرة دماغ اية
قلتلة : ضانى ربع ساعة من الانتظار والتمعن فى اجمل ديكور مشفتوش فى حياتى ولقيته طب عليه ومعاه كتله عظمية بيسموها راس
قلتلة هو دا الدماغ
قالى طبعا
قلتلة :انا مكنش قصدى دا
وعنيك ما تشوف الا النور لقيت حاجات بتنزل على دماغى من تحت وحاجات بتطلع عليا من فوق وهاتك يا لمس اكتاف المهم خرجت وانا كل حتة فيا فى ناحية وبدأت الم نفسى من الشارع ولقيت حاجة طرية كدا وهى اللى انا كنت اقصدها اخدتها ودخلت للراجل عشان اقولة حضرتك هو دا الجزء اللى كنت اقصدة
جابلى كرسى وترابيزة صغيرة على قدى وقالى عقبال ما تلم نفسك اكون جبت لحضرتك المخ اللى انت قدك فية
قلتلة : طب واية الفرق
قالى حضرتك طلبت دماغ وهى جواها مخ وعين وسنان ولا مؤاخذة مناخيييير وودان
قلتلة : وفين العقل
قالى : حضرتك الحيوانات ملهاش عقل
واستشفيت كدا بذكائى الخارق انى لازم اروح اسأل الكمبيوتر وهو يجيب
وسألت الكمبيوتروقلتلة يعنى اية عقل
رد عليا وقالى : العقل جزء غير مادى يوجد بجسم الانسان وهو المسؤول عن التفكير والعاطفة والتخزين والخيال والتحليل الى اخره_ هو قالى ...الخ
ولما استفسرت عن معنى .... الخ
قالى الى اخرة _ المهم قلتلة وبخرن فين لما هو مش جزء ملموس
قالى بيخزن فى مكان اسمه المخ
وبما انى قليل العقل قلتلة . طب واية الفرق بين الدماغ والعقل والمخ ؟
قالى ان الدماغ هو المكان اللى فية العقل والمخ
وعشان ءأكدلة ان انا معنديش عقل سألتة وقلتة ازاى العقل جوا الدماغ وهو جزء مش ملموس
متردوا علينا يا عاااااااااااااااااااااااااااااالم

ـــــــــــــــــــــــــــــــــــــ
انا حطيت الصورة الوحشة دى بجودة عاليا
قلت يمكن حد متعجبوش يقوم محملها
ـــــــــــــــــــــــــــــــــــــ
عودا احمد
دى لنفسى

5 comments:

خمسة فضفضة said...

السلام عليكم ورحمة الله وبركاته

حمد الله علي السلامه يا محمود

كل سنة وانت طيب

انت رايح تهزر مع صاحب المسمط طيب احمد ربنا انه ماستخدمش الا اديه وطلع راجل عنده عقل ودماغه فيها مخ

والا كان زمانه استخدم ساطور مثلا وطكان زمانك متعلق علي باب المحل

ههههههههه

سلام

محمد الجرايحى said...

السلام عليكم ورحمة الله وبركاته
أحييك على طرحك الرائع والقيم
بصراحة أسلوبك جذاب ومشوق
وفكرة المقال أكثر من رائعة
سعدت بالتعرف على مدونتك الطيبة
وكل عام وأنت بخير
وعيدكم سعيد
أخوك
محمد

أبو صلاح said...

فعلا بعض المصريين عندهم مخ وبس .. لكن مش كلهم .. فيه مصريين كتير عندهم عقل .. لكن للاسف القسم الاخر هم اللي له اليد العليا ..ههههههه

واحمد ربنا ان صاحب المسمط سابك سليم بعد ما استظرفت عليه ههههههه

تحياتي

حاجــ عيال ــات said...

السم عليكم
كل سنة وانت طيب يا أبو عقل
ومرسي على البوست الجميل ده وبجد مفيد وممتع
ويارب تكون لحمة العيد حلوة ..وكتر من الضاني

يالا سلام
جهاد مشالي

م/ الحسيني لزومي said...

تقبل الله منا ومنكم
وكل عام وانتم بخير