2008/08/31

رمضان احلى ايام

رمضان : الفانوس ابو شمعة
رمضان : صوت المسحراتى
رمضان : زينة وفرع نور
رمضان : صلاة تراويح فى كذا جامع
رمضان : فطار مع عيلتى
رمضان : سحور مع اصحابى
رمضان : بلح عجوا
رمضان : ناس بتصفى
رمضان : قعدة المغرب والفرجة على الناس وهى بتجرى

عمرك جربت فى يوم متروحش تفطر وتقعد فى الشارع ساعة الفطار
تتفرج على الناس اللى بتجرى عشان تلحق الفطار
فى الاول كنت بقول الناس دى بتجرى ليه
مع انهم صايمين طول النهار ومش قادريين يستنوا ربع ساعة كمان
حتى لو وصلت لأكتر من نص ساعة مش هتفرق من جملة الساعات اللى صايمينها
بس عرفت ان الناس دى بتستمتع جدا وهى قاعدة تاكل ولو بلحة واحدة ساعة الادان مع عيليتها

طب جربت فى مرة الفانوس القديم ابو شمعة
وتمسكة من مسكتة اللى بتجرح الايد وميهمكش شكل الدم اللى فى ايدك
وتحط الشمعة وتولعها وتقفل الباب وتلف بيه فى الشارع
وتيجى وقت الصلا تروح على الجامع وتقعد تلعب انت والعيال الصغيرة اللى قدك ورا الصفوف
ولما تكبر شوية تقف فى الصف وتصلى ولما تتعب تقعد برضة ورا الصفوف

جربت تقعد مع اصحابك على القهوة وتلموا من بعض كل واحد جنية ونص وتروحوا تجيبوا سحور
فول وطعمية وبتنجان مخلل ولو فى بطاطس يبقى الدنيا اتظبطت جامد
وتخلص وتروح تجيب علبة زبادى وتاكلها او تطلب زبادى بدل ماتقوم وترجع تقعد برضة على القهوة
وتروح البيت بعدها تلاقى عيلتك بتتسحر وتقعد تاكل معاهم وبطنك تتنفخ على الاخر
وكان زمان نقعد نسمع الشعراوى لحد الفجر
ونروح نصلى برضة فى الجامع
ومتعرفش ترجع عشان قابلت اصحابك وتقعدوا تتكلموا لحد مالنهار يطلع

جربت تروح لقرايبك تسلم عليهم وتهنيهم برمضان
ويجبولك الحلو وبرضة تاكل وبطنك تتنفخ تانى
وتسمع اغانى رمضان وتتفرج على بكار وتشوف شكل المسلسلات اللى بتتعرض
وتقرر بعديها هتتفرج على انهى مسلسل

جربت تخرج لما تسمع صورت المسحراتى تديلة رغيف عيش او نص جنية وتمسك البازه وتخبط عليها وتعمل صوت نشاز مش زى الصوت اللى بيعملة المسحراتى
وتتصل باصحابك تصحيهم مع انك عارف انهم صاحيين

جربت تعمل البسكوت والكعك مع مامتك واختك
وترخم عليهم وتبوظلهم شوية من العجين اللى بيعملوة
وتبقى مستمتع جدا وانت ماسك اللى انت عملتوا بايدك بعد مايستوى

جربت قبل الفطار تعمل السلاطة بايدك
وتقعد على الفطار تذل عيلتك كلها " انا اللى عامل السلاطة انا اللى عامل السلاطة " وتبقى فرحان
او تعمل العصير وتحضر السفرة
وتخش المطبخ بعد الاذان تقعد تخطف من الحلل مع انك عارف ان مامتك لو شافتك هتزعقلك

جربت تتفرج على الدورة الرمضانية مع انك مش بتحب الكورة
وتشوف اصحابك اللى نازلين فى الدورة وهما بيخسروا وبيطلعوا من اول دور
وتشمت فيهم وتقولهم عريتونا مع انها مش فارقة معاك

جربت تختم القرآن فى رمضان وتكمل قراية بعدية
وتصلى التراويح كاملة
وليلة 27 فى جامع عمرو بن العاص
وليلة العيد فى الحسين


ــــــــــــــــــــــــــــــــــــــــــــــــــــ
البوست دا مش اكتر من احاسيس بحسها فى رمضان
يمكن فى حاجات لسة بحسها منهم
وحاجات حاسس انها ماتت
ـــــــــــــــــــــــــــــــــــــــــــــــــــ
رمضان كريم


20 comments:

خمسة فضفضة said...

السلام عليكم ورحمة الله وبركاته


كل سنة وانت طيب يا محمود وبعوده الايام

ما تعرفش الاحساس اللي جالي وانا بقرا البوست الجميلاللي طالع من القلب ده عنيا دمعت وقلبي رفرف وعاوزه انهارده يعدي بقي عشان رمضان يبدأ

اللهم بلغنا رمضان وبارك لنا فيه وتقبل صلاتنا وصيامنا وقيامنا

اللهم اكتبنا مع القانطين ولا تكتبنا من الغافلين


سلام

مهندس مصري بيحب مصر said...

ياه يا محمود
دا انت حسستني انك بتتكلم عني في اغلب الكلام ده
البوست ده مسني قوي لأنه طالع من قلبك بإحساس صادق و جميل
في حاجات كتيرة من اللي قلتها ماتت طبعاً بحكم الكبر في السن
فعلاً ايام الطفولة ما تتعوضش
و جات الغربة كملت على شوية الحاجات التانية

كل سنة و انت طيب يا محمود و اقرب الى الله سبحانه و تعالى فيها
:)

حاتم عرفة said...

قشطة عليك يا دوح
كل سنة وانت طيب
و ربنا يعينك

ماتنساش تزورنا
وحياة الجزويت وانا عارف إنه غالى عليك

(:

تحياااااااااتي

قوس قزح said...

يارب
كلما طرق هذا العبد بابك
أفتح له كنوزك
و سخر له عبيدك
و ابسط له رحمتك
اللهم اجعله من الصائمين القاثمين
الركع السجود
و بارك له فى شعبان و بلغه رمضان
فى يسر و سلامة و امان
اللهم امين

كل سنة و انت الى الله اقرب

أبو خالد said...

أبني الحبيب محمود الدوح
كل عام و أنت و الأسرةالكريمة بخير
و بعودة الأيام الجميلة و ذكرتني بأشياء كنت أواظب عل عملها
دمت علي طاعةالله أدوم وبارك الله في عمرك و رمضان كريم

محمد عبد الغفار said...

تقبل ا لله منا ومنكم صالح الأعمال وكل عام وانت لله اقرب وفى خير وسعادة وصحه وهناء ورضا انت واسرتك الكريمة وبلدنا وامتنا الأسلامية

حسن ارابيسك said...

ابوحنفي
أنا ابتديت من حظك اليوم جعلتني أضحك من قلبي تخيلت الموقف فعلا موقف الجريدة والضحك والناس
ده موقف كوميدي نابع من قلب التراجيديا وحال المسكين اللي بيضحك من وجيعته بدل مايبكي عليها

ثم دليفري
معك كل الحق ما أكثر التمني بجوار كباية شاي وحجر تفاح ودورين ايستميشن
والخطوة الوحيدة التي يخطوها الواحد منهم هي خطوة القهوة والتمني

رمضان أحلى أيام
كما سبق واشار الأخوة المدونيين أنت تتكلم بلسان حالنا وقت أن كنا مثلك في هذا السن نفعل كل تلك الأفاعيل الجميلة والمحببة إلى قلوبنا في ذلك الشهر الكريم
وأنت ايضا تتكلم عن كل تلك الأحاسيس التي كنا نشعر بها
مثل
وقت ما قبل الأفطار والناس بتجري
وسلطانية زبادي
وشوية طرشي في السلطانية أو كيس طرشي
وفي أواخررمضان وصاجات الكحك واللي رايح واللي جاي بصاجات نمسي عليهم ونمد ايدينا كل واحد بكحكاية
وكتير كتير
قلبت علينا ذكريات ووجعت قلبنا بس بحب حب الناس للذكريات الجميلة
كل سنة وانت طيب
دائما متميز بموضوعات أولاد البلد
تحياتي
حسن أرابيسك

Anonymous said...

كل سنة وانت طيب

همس الاحباب said...

كل سنة وانت طيب يا باشا
ورمضان كريم
يا باشا انا موجود فى القهوة كل يوم من بعد التراويح
لحد الصبح

Unknown said...

كل سنة وانت طيب

رمضان كريم
وتدوينة رمضانية جميلة جداا
مليئة بدفء رمضانى جميل

Anonymous said...

الكلام جميل

وكل سنة وانت طيب

رمضان كريم

و البوست رائع

Empress appy said...

كل سنه وانت طيب يا دوح وبقيت مهم ومشغول اهو يالا النونو كبر هههههههههههههه

ساسو said...

كل سنه وانت طيب يا محموود ورمضان كريم
معلش جايا متأخر
البوست بجد جميل اوي واحاسيسك رائعه ويابختك بجد لان في حاجات كتير انت قلتها مأصليش عملتها ومنها حكايه الفانوس ابو شمعه
فيوم من الايام همسكه
تقبل الله صيامك وقيامك ان شاء الله

aya said...

كثيرا ما تكون ذكرياتنا هي ما يضفي علي حياتنا بعض المتعه
وكثيرا ما تسبب لنا الالم او علي الاقل الحزن عندما نعلم انها لن تعود
ربما تتمني داخلك ان تفعل اشياء يظن البعض انها لاشئ او من التفاهه فعلها ولكن عندما ننظر الي اثرها علينا نشعر حقا بالسعاده

كل عام وانت الي الله اقرب
تحياتي واتمني دوام التواصل

أكون أو لا أكون said...

كل سنه وانت كيب يامحمود...
رمضان كريم...
فين الغيبه ده ...
ذكرياتك جميله يا محمود... ياربي يديم عليك الايام الاحلوه...
طمني لقيت الموبايل؟

الدرعمي said...

السلام عليكم

حلو كده ؟

كل سنة وأنت طيب

أيها الدووووووح الجميييييييييل

ورمضان كريم

أنت كما عهدتك

طفل في جسد رجل

وديع

طيب القلب

تستحق فانوس من عمو آدم


هههههههههههههه

يللا شالوووووووووووووم

وأراك على خير حال

رمضان كريم



آدم

كـــيــــــــارا said...

كل سنه وانت طيب

بوست بجد قلب زكريات جميييييييله اوي وي

بنفتقدها سنه ورا سنه

تحياتي

Soooo said...

اتنين كل سنه وانت طيب

اول واحده بتاعة رمضان ولو انها جايه متأخر
وتاني واحده بتاعة عيد ميلادك

كل سنه وانت طيب ياقط
وليك عندي شوب نيسكافيه




سلاموووووووووووز

Ahmed Al-Sabbagh said...

كل سنة وانت طيب يا احلى دوح

ودايما مستمتع بحو رمضان الجميل

احمد

ojg said...

مش هتصدق لو قلتلك اني دمعت
رمضان عندي كل ده واكتر
حاجات كتير مش عارفه مابقتش موجوده دلوقت ليه
ورمضان بييجي ويمشي وانا اقعد ادور فيه على حاجات زمان
بس مش بلاقيها
ميرسي اوي انك حسستني اني مش لوحدي
:)
كل سنة وانت طيب