2008/04/29

مدير بارد وتنح ومعندوش دم


مكنتش اتخيل فى يوم انى يتحقق حلمى واشتغل اى حاجه حتى لو مش تخصصى.

الادهى من انا اشتغلت انى اشتغلت فى الشركة اللى انا كان نفسى اشتغل فيها من زمان.

الشركه عندنا نظامها غريب جدا وعامل زى درجات السلم من المدير للغفير وبينى وبينك انا كنت من درجة متوسطه او اقل من متوسطة بس فى الاخر احنا كلنا شركاء فى الشركه دى لانك عشان تشتغل فى الشركه دى لازم تكون شريك فيها وكله له حقوق بس حسب الدرجه اللى انت شغال فيها يعنى الغفير ليه حقوق والمدير ليه حقوق و..... ليه حقوق , وزى ماكله له حقوق كله عليه واجبات , لكن المشكله الوحيده اللى فى الشركه المدير اللى ماسك الشركه من 25 سنه كأنها شركة ابوه والادهى من كدا انه عايز يمسك ابنه " جميل " مكتب الادارة من بعده ,بس انا عن نفسى مش زعلان انه ماسك من 25 سنه ولا انه هيمسك ابنه من بعده الاداره , لكن زعلان انه مش بيدى حد من العاملين حقه . وبعدين ابنه مينفعش يمسك من بعده الا لما العاملين ينتخبوه !!!!!!!!!!!!!!

اه ينتخبوه انت استغربت ليه , هو النظام عندنا فى الشركه كدا لازم المدير يكون منتخب من قبل العاملين فى الشركه , المشكله ان المدير كل مره يدخل الانتخابات ويكسب بنسبة 99.9% _ انا عن نفسى من 0.1% اللى مش بينتخبوه _ وكلام فى سرك محدش يقوله لحد _معظم الناس اللى شغاله فى الشركه مبترحش الانتخابات او بتروح ومش بتنتخبه بتنتخب حد غيره وان الناس تنتخب حد غيره دى محصلتش غير مره واحده عشان كان قبل كدا تروح وتقول عليه (يا نعم – يا نعمين )

بس هو قرر يخلى فى اكتر من مرشح لمنصب الاداره ويا ويل اللى يرشح نفسه هيبقى فى خبر كان , واكبر دليل على كدا " المهندس : أمين أنور " اللى اتهمه بالتزوير فى اى حاجه وكل حاجه .

المهم نرجع لأصل الموضوع وليه انا بقول على المدير انه بارد وتنح ومعندوش دم .

عشان هو الوحيد اللى بيبقى عارف نتيجة الانتخابات والنسبه الحقيقية بتاعتها وبيبقى عارف ان العاملين كلهم مش عايزينه وبرضه ماسك فى مكتب الاداره , ويكدب الناس ويقولهم انهم انتخبوه وهما منخبهوش ولا اى حاجه , لأ واخر صيحه " قانون مكافحة العمال " ودا قانون جامد عشان يعيش فى الشركه هو والعائلة الاداريه الكريمه لوحدهم من غير اى عاملين خالص عشان يرتاح من هم العاملين ومشاكلهم , ومن الاخر كدا مبروك على جميع العاملين بشركة " نصر " المدير " مبروك " وابنه المدير القادم " جميل " والام العظيمة لكل العاملين بالشركة " سوسن " .

7 comments:

Ahmed Al-Sabbagh said...

أول تعليييق

انت اصلا يا دوح ابن حلال وتستاهل كل خير وده اقل واجب تجاهك مدير بارد وتنح ومعندوش دم

لا ده قليل عليك ياراجل

ماهو من اعمالكم سلط عليكم

هههههههههههههه

لا بجد بوست حلو اوى

تحياتى

احمد

بنوته مصرية said...

ههههههههههههه


مبروك علي الشغل

يا عم هو حد لاقي شغل كل شغل فيه عيوب ومميزات

ربنا يوفقك

تحياتي

خمسة فضفضة said...

السلام عليكم ورحمة الله وبركاته


محمود ازيك

باقولك ايه انت بتحب الحلاوه ساده ولا بالبندق ؟؟؟؟

وتحب العيش يكون عادي ولا فينو ؟؟؟؟

هههههههههههههه

مبروك الشغل وعقبال ماربنا يريحك ويريحنا من سي المدير وعيلته ومحاسيبه ومحاسيب محاسيبه

سلام

Sampateek said...

جميل و لا جيمي؟

رمزية بتسلم عليكي و بتقولك الحكاية مفقوسة خالص و طلع منها كتكووووت


و ربنا يستر

تحياتي

sendbad said...

لك تحياتي ياصديقي ربنا يديك القدرة علي التحمل
لك تحياتي

رغده رشاد said...

رقم 9 بقى رقم مقلق كدا لوحده حتى لو كان نتيجة ثانوية عامة...ربنا يسهل و على ماجى اشتغل فى الشركة دى ميكونش لسه عمو المدير ده مستربع هناك...لاء مش هاستحمل

tota said...

بجد بوست رائع جدا وتشبيهاتك واضحه اوي ومفهومه حبيتبن بش اسمعه ابنه جميل الي عايز يمسكه الادراه طب وابنه علي ملوش فيها صح صح شكلك هتودي نفسك في دهيه ربنا يسهلك بجد بوست رائع منتظره زيارتك
(سياده الرئيس.........اريد ان اهرش)
www.confusedgirl-tota.blogspot.com