2008/01/06

استفزاز

من قترة وان بتابع مدونة انا حرة لصاحبتها ياسمين وكنت لما بدخل على التعليقات كنت بلاقى واحد مسمى نفسة جزافا " واحد من الناس التانية " وفضل يقولها انا عايز اتجوزك
انا مش عارف انا لو كنت بنت كنت هرد علية ازاى ولو مكنتش هرد علية من اصلة
المهم هى كانت بترد فى هدوء وفى حدود ودا اللى انا كنت شايفة
ــــــــــــــــــــــــــــــــــــــــــــــــــ
فكرنى الموضوع دا بالموضوع اللى كنت كاتبة عن صندوق الشات بوكس اللى انا مش بحبة
ــــــــــــــــــــــــــــــــــــــــــــــــــ
والموضوعيين خلونى اتكلم عن ناس مستفزة بعينها
يعنى واحد يدخل يعلق وميكتبش اى شئ يخص التدوينة او المدونة
يدخل على المدونات المشهورة ويكتب اى كلام فى اى حاجة واهو ساب لينك عشان الناس تزورة
واحد يدخل مدونة متعجبوش يشخبط فى الشات بوكس
يكتب تعليق يشتم صاحب المدونة
زى بالظبط من يومين كنت فى مدونة واحد اخوان وقريت تعليق لواحد معرفش انتماءة اية لكن لقيت التعليقات مابينهم خرجت عن حدود المعقول وصلت لدرجة توصف بيها نقاشهم بانة لعب عيال
لية ميبقاش عندنا اخلاق نتحلى بيها فى اى مكان سواء كنا فى عالم افتراضى او حقيقى
لية عشان على النت محدش يعرف شكلنا ولا حد هيعرف يجيبنا نعمل اى حاجة حتى لو هنضرة
ــــــــــــــــــــــــــــــــــــــــــــــــــ
الموضوع دا مش اكتر من فضفضة

5 comments:

Bella said...

معاك انه امر يزعل ويستفز انك تلاقي مدونتك هدف لبعض الناس ذوي العقول الهايفة ومدمني الشتائم

بس صراحة اعتقد ان الشخص اللى مش طبعه يشتم في الواقع مابيشتمش برضه في العالم الافتراضي

يعني مش معنى انك ماتعرفنيش اني ادخل اشتمك او ارد عليك رد غير لائق
حتى ولو باسم مجهول
صراحة باحس ان اللى بيعمل كده اصلا بيكون ده طبعهم برة النت مش حكاية تخفي ورا اسم مستعار او بدون اسم اصلا فده بيشجعه يشتم
هو سهل يغلط
علشان كده بيغلط

ربنا يهدي الجميع
ويبعد عننا هواة الشتم والسب

AbdElRaHmaN Ayyash said...

كلام جميل اوي
مش بس كده
ده كمان اللي بيعلنوا عن حاجات ملهاش اي لازمه
و الحملات اللي كترت على الفاضي من غير اي تأثير
بجد .. اعتقد ان المدونين لازم ياخدوا بالهم من ذوقيات .. هتشكل المدونات من اول و جديد
سلام

عصفور المدينة said...

على فكرة يا محمود كم الاستفزاز اللي موجود ده كنت بانفعل منه لكن لما كثر أصبحت أتعايش معه وأسحاول الاستفادة منه
يعني لما تدخل مدونة تلاقي واحد كاتب تدوينة بيشتم فيك شخصيا بدون أي سبب مقنع وبعدين تلاقي ناس بتحاول تقنعه وهو مصمم مش يسمع وبعدني تسقط الكلام ده على الواقع تلاقي إن انت ممكن بتتعامل مع ناس داخلهم مثل هذا القدر من الغل مع علمك إن في الواقع لو قابلته حيبتسم في وشك وياباشا وكدة فدي بالنسبة لي خبرة

لما اكتب عن الحكماء ودورهم في المجتمع والاقي تعليق بيقول كلمتين
"يابن العبيطة"
فدي بالنسبة لي خبرة إني مبسوط ومستمتع ومحتسب الأجر ومشغل مخي وفيه ناس نفسيتها تعبانة من الغل والحقد

لما تلاقي زي مانت قلت إن واحد بيعلق لمجرد التعليق وتسقط ده على الواقع تعرف إنك بتتعامل مع ناس ممكن توددهم إليك يكون عشان هدف شخصي وبس

لما تشوف ناس بتتكلم حوار طرشان تحس إن كل واحد بيتكلم وما حدش بيسمع وتسقط ده على الواقع وتلاقي إنك بتدخل في نقاشات من هذا النوع في الواقع وإن اللي قدامك مش سامعك وتتعلم تقول له لو سمحت اسمعني يا إما نوقف النقاش

لما تلاقي ناس بتتناقش ويخرج الموضوع للسباب والاتهامات وانت كاره لده تعرف قيمة العقل والإنصاف اللي ربنا من عليك بيه

لما تحط تحذير تقول ما تعلنش عن حملة إلا لما تعلق على موضوعي ويجيلك واحد يقولك إعلان أهو واحذفه لو كنت عايز تحذفه

لما تشوف ده كله حتلاقي معاه جرعات جميلة من الحب والتفاهم والعقلانية وأدب الخلاف برضه حاجة تعدل الدماغ برضه


وهكذا انا بقيت استمتع بالظواهر المستفزة ما انكرش إني كنت باتضايق

حسن ارابيسك said...

الحقيقة انا حرة من المدونات الرائعة وصاحبة قلم وفكر متميز جدا
وبخصوص الاستفزاز انا معك في كل اللي قلته بس تقول لمين وتعدي لمين..عدي

ام البنات said...

ارى تجاهل الردود الغير مقبول اكثر
ايجابيه لان صاحبها سيشعر بعدم اهمياته وإهلنا له هيضايقه ويخليه مريجعش تانى
والحقيقه انا عامل مودوريشن علشان اريح نفسى
وبرضه بيدخل اى حد يغير مسار البوست بس الحمد لله التجاهل بيجيب فايده كبيرة