يوميات س وج

س : بتحب مصر ؟
ج : مش عارف .
س : يعنى اية مش عارف ؟
ج : مش عارف احبها لية مع انى فى مليون سبب يخلونى احبها
ومش عارف اكرها لية مع انى فى مليون سبب يخلونى اكرها
س : يعنى انت كدا واقف فى الاوفسايد؟
ج : مش بالظبط.
س : ممكن توضح .
ج : بص ياسيدى . انت شفت فيلم " مافيا " بتاع احمد السقا ؟
س : اه مالة ؟
ج : فاكر حسين فهمى قال للسقا اية ؟
س : قالة يلا بينا نسمع الاغنية دى .
ج : متستغباش .قصدى الحتة بتاع مصر والام .
س : اه افتكرت . لما قالة امك وحشة.
ج : يا اخى مش بالمعنى دا . هو كان قصدة ان امة مش احلى واحدة فى الكون لكن برضة بتحبها.
س : ودا اية دخلة فى موضوعنا
ج : هو دا اول سبب من المليون سبب اللى يخلونى احب مصر.
س : طب واية اللى يخليك تكرهها .
ج : فاكر احمد السقا قال اية لحسين فهمى قبل ما حسين فهمى يقولة الكلمتين دول .
س : فاكر قالة يلا
ج : يلا فين
س : نسمع الاغنية
ج : ياغبى مش دى اللى انا اقصدها . انا قصدى لما قالة "مصر ادتنى اية عشان احبها.
س : افتكرت . بس اية دخل دا فى موضوعنا .
ج : هو دا اول سبب من المليون سبب اللى يخلونى اكرة مصر
س : برضة مفهمتش انت بتحبها ولا بتكرها

" شاشة سوداء تتوسطها كلمة النهاية مع صوت ضرب وخناق فى الخلفية "