2009/12/12

عن يوم البؤجة

صباح عادى جدا خروج من غير فطار وكباية شاى على ريق النوم وشوية فوقان عشان نعرف نخرج واحنا فايقين , ركبت الميكروباص وتنين ستات راكبين فى الكرسى اللى جمبى وبدءوا يتكلموا زى بقيت الستات اللى هما شاطريين قوى فى الرغى , فا انا قلت مش ناقصة صداع ع الصبح من قبل ما نصطبح حتى , المهم انا حوارهم شدنى جدا , الاتنين شكلهم مش بيشوفوا بعض بقالهم كتير وكانوا بيتكلموا عن بنت واحده فيهم اللى هى دلوقت فى بكالريوس تجارة جامعة القاهرة ولما عرفت ان بنتها فى كلية تجارة جامعة القاهرة حسيت ان فضولى تجاه كليتى بيثير حاسة السمع عندى وبيتضرنى انى ارمى ودانى تحت بقهم الاتنين , المهم انا هحكيلم الحكاية , البنت من الكلام اللى انا سمعته عندها اعاقة فى رجليها وانا اتعلمت منازل بعد ما كان ابوها رافض موضوع التعليم عشان خايف عليها وامها حاربت لحد ما ابوها وافق انها تتعلم منازل وبدأ يجيبلها كتب تذاكر فيها ولما لقيها بتحب القراية بدأ يجيبلها كتب فى مجالات تانية غير الدراسة فى _زى ما امها كانت بتقول _ القصص والدين وكتب تانية كتير ولما خلصت ابتدائى امها فضلت مصممه ان بنتها تكمل تعليمها ودخلوها اعدادى برضه منازل وثانوى منازل برضه وامها قالت انها ما اخدتش دروس غير فى الثانوية العامة فى 3 مواد بس اللى هما الرياضة والانجليزى والعلوم _ هى قصدها الكيميا _ ودخلت كلية تجارة وامها اللى بتوديها الكلية وبتستناها لحد متخلص محاضراتها وترجع بيها ولو البنت عندها 3 محاضرات امها بتروح تعمل اى حاجة فى البيت وترجع تانى تاخدها من الجامعة والبنت بتجيب تقدير جيدجدا وبتحب القراية اكتر من اى حاجة تانية فى الدنيا , ونسيت اقولكم ان اخوها كان رافض انها تدخل الجامعه رغم انه خريج تجارة برضة وكان بيقولها ان مفيش حد بيعترف بالتعليم فى مصر وانه ملوش لازمة عند البنات وكان رد البنت ان اخوها ممكن يشتغل فى الفاعل _طايفة المعمار_ لكن هى مش هتقدر تشتغل غير بالطريقة دى انها تتعلم الست التانية كانت طول الطريق تشكر فى اخلاق البنت وجمالها ونسيت برضة اقولكم على الكلام اللى خلانى اعيط بينى وبين نفسى عن ام بتتكلم على اطفال بيكبروا وبيلبسوا وبيمشوا وبيعيدوا وبيفرحوا بالتنطيط فى الشارع وبنتها قاعده قدامها مش بتتحرك هى حكت كتير عن وجعها لما كانت بنتها صغيرة وازى ربنا ثبتها ومخلاش عقلها يتزحزح من مكانه , لهنا القصة تنتهى اى نعم انا سمعت اكتر من اللى كتبته لكن انا محتاج اقولكم ازاى الناس دى بتحسسنى بمدى عجزى واعاقتى , ناس ربنا اداها بلاء ومع ذلك تلاقيهم مصريين على النجاح والتفوق والتعايش وانها تعيش وانا وربنا مدينى كل حاجة ممكن اعمل بيها نجاح رافض انى اعيش فى الدنيا عشان حاسسها صعبة عليا , واذا كانت صعبة عليا مع انى مش ناقصنى حاجة فما بالك بالبنت دى وظروفها واعاقتها ومش عاوز اتكلم على شكل الظروف المادية اللى انا حسيتة من لبس امها وطريقة كلامها , بجد كان نفسى اقوم ابوس ايد امها عشان هى ست عظيمة بجد بس مقدرتش اتكلم معاها وكنت محروج جدا من نفسى .

تانى مواصلة المترو وازى المصريين بقى بيعملوا حاجات غريبة , ولد وبنت غالبا من الصين عماليين يبصوا فى الخريطة اللى فى كتاب المرشد بتاعهم ويبصوا لاسماء المحطات ومش قادريين يعرفوا هما هنزلوا فين وانا بتابع الموضوع من بعيد واحد يقوم ويسالهم انتوا رايحيين فين ويقولهم انت رايحيين الهرم وارجعوا المحطة اللى فاتت غيروا منها طريقكوا مع اننا كن فى محطة السيدة زينب وهما رايحيين مار جرجس والراجل انا اسف بجهله كان هيخليهم يروحوا الهرم وشوية شباب واقفين يقولوا لو بيتكلموا انجليزى كنا قلنالهم لحد ما فى حد قالهم على المكان اللى هما عاوزينه دا طبعا بعد كم الهزار والتريقة اللى اخدوها من الناس ولو فى احاديث جانبية .


وصولى الى ارض زهراء المعادى , خرجت من المحطة وانا بيتهيالى انى جيت هنا قبل كدا مرة وافتكرت انها كانت خطوبة واحدة صاحبتنا وحاولت اوصل للمكان اللى فيه مسجد الزهراء لحد ما وصلت لقيت هناك 3 بنى ادمين اولهم ماما فاتيما وشريف باشا والهلالى سلامة وبداية من هنا احب اقولكم محدش يزعل منى لو مش لقى اسمه او لقينى كاتب اسمه بس من غير مدونتة عشان انا معرفش مدونات خالص , المهم شريف باشا عزمنى على كباية شاى على قهوة قريبة ورجعنا لقينا ان فى تلاتة تانى جم هما مروة وبسكوتة ومانو اللى طلع يعرف المنطقة اللى انا عايش فيها وهو مهندس زراعى ومئجر 5 فدادين زارعهم يوسفى وفراولة وحاجة تانى مش فاكر ايه هى المهم وقفنا وشوية وجت بدرية ومن بعديها وليد ابو عمر وحرمة هبه وعمر نفسه اللى كان معاه فار صغير كان شبه ريمى اللى فيلم الفأر الطباخ ربنا يخلهلهم عمر وفاره وشوية تانى وجه فاروق والناس بدات تتسرسب زى حنفية المية بالظبط وشوية وجت دكتور ستيتة وخالد وشوية وجم الاخوة الاشقاء ايناس ونسمة ومعهاهم ولد لطيف اسمه محمد كانت عجبانى ابتسامته اكتر من ابتسامتى وشوية وجه ضياء اللى بيحسس خالد بالضعف بسبب فرق الطول ماعلينا معلش ياخالد وطبعا انا مش ناسى بس برخم على اختى اللى شكلها اصغر منى بس هى اكبر بحوالى اربع سنين ميرا اللى ممكن تضربنى لو مش لقيت اسمها مكتوب واخدنا بؤج الخير وودناها على جمعية صحبة خير واحنا دخلنا الحاجة من هنا وصلاة الجمعة اذنت فسبنا البنات وروحنا على الجامع عشان نصلى , دخلنا اتوضينا وسمعنا خطبة لذيذة عن الجواز وزاى ان الشباب العازب ربنا مش بيحبه وازاى ان احنا مقصريين فى حقنا وحق ربنا بعدم زواجنا وازاى احنا ممكن ندخل النار عشان مش متجوزين والخطيب قال حديث مرتين بخطأ المرة الاولى كنت فاكرها ذلة لسان لكن اتاكدت انه قاصدها او انه مش حافظ كويس .

ماعلينا رجعنا تانى للجمعية دلخنا لقينا ابى جت وكان عيد ميلادها ودخلت قلتلها كل سنه وهى طيبه واديتها طوفى كان معايا بدل الهدية وطبعا هى زيها زى ميرا بيحبوا يدايقونى فمرضيتش تاخد الطوفى منى وقالتلى انا مش هتنازل عن تورتة عشان الناس كلها تاكل , وطبعا عشان انا بحب اختى ابى نزلت علطول وندلت معاها ومجبتش التورتة بس جبت الاحسن من التورتة الاول العسقلانى وشوية نزلت انا ونسمة وجبنا الناس اللى نفضولنا فى اخر اليوم الزوجين برضة شفقة واحسان ودا طبعا احسن من مليون تورتة , ولا اية يا ابى , وكانت داليا جت برضة واحنا بنصلى وشوية ومينا جه اللى بعتذرله عن ذاكرتى المخوخة , شوية وشرين الكردى اللى ابى قالتلى لو ركبت معاه العربية متحاولش تدايقه عشان انا عارفاك مستفز وهو مش بيحب الهزار وطبعا محصلش نصيب انى اركب معاه ودا من سوء حظى وحسن حظة وكان معاه احمد كمال الجميل اللى كله خير وشوية وجه الاستاذ احمد وابنه عمر وكان شخص لطيف وكان نفسى اضرب الواد عادل اول ماجه عشان جه متأخر شوية كتييييييييييير , رحنا بعد كدا على نادى نقابة المحاميين على كورنيش المعادى والناس بدأت تزيد بشكل كبير لدرجة انى جالى حالة فقدان للذاكرة لكن هحاول افتكر مين اللى جه بعد كدا بيتهيالى اسامة واحمد كيه ونور الدين محمود ودكتور احمد عبدالعدل اللى حسيتنى اعرفه من زمان وهو قالى نفس الكلمة وهو ماشى برضة ودا شئ حبيته قوى , وطبعا الدنيا مطرت ووقفت فى المطرة مع ان كل الناس دخلت ما عدا انا وميرا ونسمة وعادل رجع فى كلامه بعد مادخل جوه واستخبى رجع ونزل تحت المطرة زينا وطبعا مش هنسى انى كلمت فى الوقت دا تقريبا 4 بعزهم جدا يمكن الموضوع جه صدفه بس كان شئ جميل بالنسبه ليا انهم يتصلوا بيا فى الوقت اللى انا مبسوط فيه جدا , وطبعا كالعاده حسينا ان احنا ملناش متوى غير قهوة البورصة ودا طبعا بعد ما القعدة صفصفت عليا انا وعسقول وفاتيما واحمد عبدالعدل وشريف باشا ومروة وايناس ونسمة ومحمد وروحنا قعدنا على قهوة فى البورصة وجه سووووووو والصباغ ونورا مهدى اللى مخبية عليكم ان اسمها شيماء وشوية واختها جت وشوية ومصطفى ريان اللى عندة حفل توقيع كتابه التلات اللى بعد اللى جاى فى مكتبة البلد , واظن انا كدا عصرت ذهنى وذاكرتى المخوخة واللى مينا يعرفها كويس وجبت اسامى الناس اللى جت ,

وانا مروح ركبت جمب راجل فتح معايا كلام وبدأ يتكلم عن ان البلد بقت بلد الستات وبقى ياخدوا حقوق مش بتاعتم وازى انهم بيتنصفوا فى المحاكم والشغل وحاجات تانية كتير من هذا القبيل , فطبعا انا قلتله اذا كانت على المحاكم فالمحكمة ملهاش دعوه غير بالورق سواء لصالح الست او الراجل وبالنسبة للشغل مفي رجل اعمال هيشغل عنده حد مش كفئ سواء كان راجل او كانت ست وقعدت اتكلم معاه ازاى البنى ادم ممكن يطور من نفسه ومن ادواته اللى تخليه كفئ للشغل وازاى ممكن البنى ادم برضة يدور على شغل وشكل الراجل كان بدأت تختفى عنده العقدة من مسألة الستات اللى بقوا واخديين حقهم وحق الرجاله .

حاجات دايقتنى جدا جدا جدا

1- عدم وجود الخيخة العظيمة اللى كنت مستنيها تيجى ومجتش وبقولها ماشى ياماما خيخة

2- انى لما روحت لقيت فى البيت سمك لكنه للاسف كان بارد وكل دا عشان كنت معاكم وكان نفسى اكله سخن

3- الحركة الاخيرة اللى عملوها ايناس واختها ومحمد وشفقة واحسان (:

4- الشوكولاته اللى اخدها عسقول من ماما فاتيما (: مع انى اخدت علبة بسكوت بحالها من ماما فاتيما وقعدت اوزع فيها لما شبعت منها (:

5- ان انا غالبا نسيت اسماء ناس جت ومكتبتهاش (: بس انا عارف ان مفيش حد هيزعل منى


حاجات فرحتنى جدا

1- اتصال بشمهندس مصرى وانى كلمته

2- عرفت ناس جديدة بالنسبة ليا قمة فى الاخلاق والظرف وتقل الدم (:

وبيتهيالى كدا بس كفاية عليكوا عصرة الدماغ اللى انا عصرتها

21 comments:

فاتيما said...

واااااد يا محمود
أزيك الاول
إيه البوست المتين دا ؟
نحن نشكر البؤجة
اللى خلتك ترجع تكتب تانى
دحنا على كدا نعمل بؤجة مل يوم
النبى ما تبصو لعسقول الغلبان
ف الشكولاتية حرام عليكوووو
انا رايحة إن شاء الله
لمصطفى ريان يوم التلات
مكتبة البلد
الراجل محتاج للناس تبقى جنبه
و ابقى تعالى لو فضيت
عجبنى قوى الحكاية اللى حكيتها
عن البنت و الام ف المترو
و غريبة قوى ..إن لسه فيه ناس بتقول للتعليم لأ و تناكف ف أهميته ؟؟؟
سيبك انتا
وجودك امبارح كان مخلى
لليوم روح حلوة
و معاك أن غياب خوخة
عكنن علينا شوية
بس عقبال كل البؤج الجاية
تكون سعادتك منور فيها
و خيخة قبلنا كلنا
خالص ودى يا فندم
و مبروك فتح الشبابيك
و حملة التنفيض و دخول الشمس
أخيراااااا للمدونة الغلبانة دى

ستيتة said...

كان يوم بدايته ماركة فلة ياروحي اني عرفتكم وشفتكم :)
بس المرة الجاية ان شاء الله اقعد معاكم كلكم اكتر شويتين علشان لما الناس بترغي بعرفها بحج وحجيج وكتاب الله المجيد
اتشرفت والله بمعرفتك
وربنا يتقبل منا ومنكم صالح الأعمال

Ahmed Kamal said...

كانت فرصة جميلة إني أشوفك يا محمود ، و حسيت إننا نعرف بعض من زمان جدا :))

بوبو said...

ازيك يا محمود عامل ايه؟
الفار اللي عمر كان ماسكه دا يا عم من مجايب الست فاتيما ربنا يكرمها.. كل مرة تدي عمر حاجة يلعب بيها عشان ميبداش اعمال التخريب المتعمد اللي بيبداها لما ميلاقيش حاجة تشغله
الواد عمر اندمج معاك خالص على فكرة ودي حاجة خلتني مبسوطة لانه ساعة لقاء المنصورة مكانش مندمج مع حد خالص غير فاتيما.. واضح ان الولد بيتطور او انك انت محبوب الاطفال
عقبال ما تتكرر اللقاءات تاني باذن الله

Unknown said...

محمود ياجميل ،، سعيد جداً انى قابلتك امبارح و فعلاً كأننا نعرفك زمن ،،، المهم تبطل تدخين بقى لأن الذاكرة فعلاً بدأت تقع :))
مين عبد العاطى ده ؟؟؟ :))

ــــــ
حكاية البنت اللى فى تجارة فعلاً تخلينا نركز ويتين فى اللى ربنا أكرمنا بيه من حاجات ناس تانية مش لاقياها


دايماً متجمعين فى الخير :)

فاتيما said...

يا بوبو
=========
الواد محمود كدا علطول
معقدنا الصراحة مع العيال
متفهميش بيموتوا فيه كدا ليه؟؟
إكمنه لطيف
و طيب
و برىء حبتين خلاص يعنى
و انتى عارفة الاطفال حساسة و بتعرف لوحدها و تستلطف لله فى لله
نور بنت رودى بنوتة مصرية برضو
كانت مديانا كلنا وش جبس
و جت عند سى محمود
و بقت لازقة فيه بغرا
احضان و شعلقة فى رقبته
لدرجة إننا قولنا
لازم نكتب كتابهم ف أقرب فرصة
لحسن كلام الناس هيكتر و مش يويس على سمعة البونية ...
هوه ربنا محبب فيه العيال
و ربنا يديمها عليه نعمة
عالله بس لما ييجى يخلف
ميكونش زهق
و يرمى عياله من الشباك !!!
خلص ودى يا محمود
و يا بوبو
و يا عمر بيكاااا
و متجمعين دايما ف الخير يا رب

همس الاحباب said...

ههههههههه
ماشى يا دوح
لما اشوفك بس
وبعدين يا ابنى حرام عليك انت بهدلت اسماء الناس كده ليه
اولا د/ احمد عبدالعدل
مش عبدالعاطى
ونور الدين محمود
مش ضياء الدين
حرام عليك بجد
ههههههههههه
كويس انك ما كملتش باقى اسمى كنت هلاقيه شوربة خالص
الحمد لله اليوم كان جميل
ودايما متالق يا دوح
تحياتى

mostafa rayan said...

باشا
اولا انا اللي فرحان قوى بالقعده الجميله اللي جمعتنى معاكو
ثانيا اشكرك يا عم على الدعايه الجامده دي بس الحفله اتأجلت للخميس مش الثلاثاء فتبقى الخميس 24-12 فى مكتبه البلد من 7 ل9
ياريت بقى تعدل المعاد فى البوست ولك يا اخى كل محبتى وودي

عاشقة القمر said...

ربنا يقدركم علي العمل ربنا يجعل في ميزان حسناتكم

مهندس مصري بيحب مصر said...

ايوه كده
الحمد لله إنك إفتكرتني و مكالمتي ما راحتش مع الزهايمر
:)

ربنا يكرمك يا محمود يا جميل

ميرا ( وومن ) said...

ايوة عندك حق سطرين كمان ومكنتش هالاقي اسمي وكنت هاجي اعضك
وانت عارف اني اقدر اجيبك

اخويا الصغنن محمود يلا صيحتلي بقي وعرفتهم اني اكبر منك :D

بجد وجودك كان مالي اليوم بهجة واليوم كان كله بجد محصلش وكل الناس الحلوة اللي جت
واتعرفنا عليها

ألف ألف الف مبرووووك انك عبرت مدونتك الغلبانه دي وعقبال كل مرة

Mano said...

ازيك يامعلمي
كده تفضحني وتقول كلمتين قولتهم بيني
وبينك
طب محروم من الفراولة

محمود الدوح said...

ماما فاتيما

انا اهو رجعت اكتب فى البلوج تانى
عشان الاقى الناس اللى مش بتدخل على الفيس بووك
وبعدين انا مبصتش لعسقول فى الشوكلاتة بس كان نفسى يبدل معايا البسكوت اللى معايا بالشوكلاتة اللى اخدها
:)

وبجد انا عنيا دمعت بس على بسيط وانا بسمع الام فى بعض اجزاء الحكاية

وبما ان خوخة كانت غايبة فدا شئ مش جميل
وانك كنت معانا دا اجمل شئ

ــــــــــ
د/ ستيته
بجد زعلت انك مش قعدتى امبارح
كان نفسى اتعرف عليكى بجد

على فكرة انا مش بقرا لمعظم الناس اللى اعرفهم لانى بطلت قراية
لكن بحب اشوفهم واتكلم معاهم
يعنى متعمليش حسابك على كومنتاتى
لازم نتقابل مرة تانى

ــــــــــ
عمنا احمد كمال
بجد انا اللى سعيد انى قابلتك تانى مرة
المرة الاولى مش اتكلمنا مع بعض كتير
والمرة دى زادت عن المرة اللى قبليها
والمرة اللى جاية همسك فيك ومش هسيبك

ــــــــــ
بوبو
انا الحمد لله
عمر عامل ايه
واوعوا يرسم ان انا اجيبله لعبة المرة اللى جايه معايا
كفايا انى اجى بنفسى
وبالنسبة لنقطة انه انسجم معايا
فللاسف او لحسن الحظ
ان الاطفال كلها بتنسجم معايا
ممكن عشان بيحسونى شبهم
بمعنى ادق
انا طفل

ــــــــــ
احمد عبدالعدل
انا عدلت الاسم

معلش بقى انت عارف غلطات الكيبورد
وبجد مبسوط جدا بمعرفتك
وبالنسبة للذاكرة فمش اول حاجة تقع
وبالنسبة للبنت
انا حاسس ان ربنا بعتلى الحكاية دى عشان اتعلم منها

ــــــــــ
ماما فاتيما تانى
بتحرجينى والله
يا جماعة انا بتكسف قوى

ــــــــــ
همس الاحباب

ايه يا عم خالد
ماشى ورا كلمة كلمة فى البوست ولا ايه
الواحد ميعرفش يغلط براحته
وبعدين انا منبة من اول البوست عن الاخطاء اللى هتحصل

ــــــــــ
مصطفى ريان
حصل خير وكل خيرة وفيها خيرة
سعيد انك جيت مع انك كنت قاعد ساكت
ونور الدين لما تشوفه اقتله وقوله محمود الدوح بيقولك مواعيدك مظبوطة

ــــــــــ
عاشقة القمر
ويكرمك يارب
ونشوفك معانا فى المرات اللى جاية

ــــــــــ
مهندس مصرى
ايه يا عم
انت من احلى حاجات حصلت النهاردة
بجد كنت مبسوط قوى
بس باين الشبكة كانت عندك او عندى مش كويسة علشان كدا مكنتش سامعك كويس
بس كنت مبسوط انى بكلمك برضة
:)
ويارب افوق بقى من الزهايمر دا
عشان كدا بقى خطر

ــــــــــ
وومن
انت تعرفى يا ميرا انى معرفش انسى اليوم اللى تيجى فيه
عارفه ليه
عشان مش دفعتى الدين اللى عليكى
:)
بجد كنت مبسوط انك جيتى

ــــــــــ
مانو
يابنى دى مش فضيحة
دى شهرة وعالمية
وبعدين انا بحب الفراولة عصير
انما اليوسفى
برضة بحبة عصير

وباكلهم طبعا
مهو انا مش معقد للدرجة دى

P A S H A said...

الغالي محمود الروح
- أنا من هنا ورايح هاسميك محمود الروح ... أنت بجد بجد بجد يا حوده إنسان أبيض من الحليب وأنا فرحت جداً إني اتعرفت عليك .... وما تتخيلش الشوية اللي اتكلمنا فيهم أنا وأنت فاتيما أثروا فيا إزاي ... بجد انتوا ناس هايلة وأنا فعلاً اتشرفت بمعرفتكم وإن شاء الله يدوم الود والتواصل

ثانياً : ليا عتاب عندك يا دوح ... بقى ده اسمه كلام يا راجل ؟؟ ... شاي إيه اللي أنت بتتكلم فيه ؟؟ يصح كده يعني ؟؟ ... لأ حقيقي أنت زعلتني منك ... عشان ما جبتش سيرة تذكرة المترو اللي عزمتك عليها ههههههههههه
ملحوظة : يا مان أنت كاتب لي نمرة موبايلك 8 أرقام ... عموماً اتشرف لو اتصلت بيا في أي وقت ... مش عشان أسجل النمرة لأ .. عشان تعزمني على قهوة :))
سلام يا جميل

قوس قزح said...

تصدق انا تهت
و نسيت اصلا ان البوست عن البؤجة ههههههههههههه
و بعد انا دلوقتى عرفت ايه سر ضحكتك المستمرة
اتاريك بتدارى بها انك عندك زهايمر

انا سعيدة بوجودك معنا لانك بتنور المكان بابتسامتك و الله و تخلى الواحد يضحك من قلبه

Sameh Ezzat - (خواطر خاطر) said...

ياااااااااا دوح يا جامد بجد كان نفسي اجي عشان اشوفك انتا وبقاي الناس الجميله
يا خصاره
مليش نصيب
:(

Unknown said...

انت زعلت منى ياخبر ابيض
طب ليه
عموما انا اسفة جداا
والله ما قصدت بس هبقى اوضح لك الظروف على جنب بس اقولك واحد منهم ان انتم كنتوا قعدين فى ملقف هوا
وانا مش بستحمل البرد ابدا

كمان محمد هو كمان معجب بأبتسامتك جداا

z!zOoOo said...

السلام عليكم

ازيك يا محمود

يارب تكون بخير

كده برضه ماتقولش اني جيت

هو انت ما شوفتنيش هناك

اخص اخص

وانا اقول انك هتفتكرني

علي فكره بقي

انا اول مره ادخل مدونتك اساسا

ههههههههههههههههههههه

بس قولت اشتغلك عشان ذاكرتك ضعيفه

خبيث انا مش كده

:D

لقاء جميل وناس جميله

بجد يا بختك

ربنا يجمعكم ويجمع الجميع في الخير دايما

سؤال بقي جانبي

هو انت تعرف حماده زيدان؟؟

ديه اول زياره ليا وبإذن الله مش هتكون الاخيره

اتمني تنورني

فرصه سعيده

:)
تحياتي

ahmed_k said...

محمود الدووووووووح
وأخيرا وصلت لمدونتك
سعدت جدا بالتعرف عليك وكل المدونين الرائعين
وأنا لسه جاي من القاهر إنهارده
فلس ما كتبتش عن اليوم ده شيئ
ولكني هنا لابد ان أعبر لك عن سعادتي بمعرفتك

دمت بكل ود

محمود الدوح said...

شريف باشا

بجد نورت البلوجايه بتاعتى
اولا شكرا على الاسم الجديد
وانا اللى بجد اتشرفت بمعرفتك
مش عشان تذكرة المترو اللى انا افتكرتها وانا بكتب بس مرضيتش عشان انت معزمتنيش عليها لوحدى
بل كان فى ناس معايا وانا مرضيتش اوشى بيهم
بس ماعلينا
وبالنسبة للقهوة فمقدور عليها
على لقاء

ــــــــــ
داليا

بجد احلى حاجة عندى ان البنى ادم يتوه فى المدونة زى ما انا تاية بالظبط
لاعارف ولا فاكر انا عملت ايه امبارح
ولا هعمل ايه بكرة
اقولك ايه انت شكلك ناوية تتوهينى اكتر من كدا
نورتى المدونة او البلوجاية بتاعتى

ــــــــــ
سامح

خسارة بالسين مش بالصاض
ايه بوظت اللغة
على العموم ملحوقة
فى لقاء تانى يوم الجمعة
فى الازهر بارك الساعة 3 اوعى تقول لحد عشان الموضوع سرى للغاية
اوك

ــــــــــ
ايناس

ولا تزعلى نفسك علشان عيل صغير زى
وعموما اتدفى كويس ومتخرجيش بخفيف الايام دى علشان الجو ساقع ساقع ساقع
ومحمد خلاص بقى فريند عندى فى الفيس بوك
:)

ــــــــــ
زيزو
بقى كدا تشتغلنى علشان موضوع الذاكرة المخوخة
انا غلطان انى اقول سرى كدا على الملأ
:)
وان شاء الله تبقى معانا المرة اللى جاية

وبالنسبة للسؤال الجانبى
اه
اعرفه
بس مقابلتوش من فترة كبيرة
:D

محمود الدوح said...

عمنا احمد
طبعا انا سايبك فى رد لوحدك علشان انت مأخر عن الناس دى
مش معنى كدا انى زعلان انى اخرت
بالعكس انا سعيد انك وصلت بالسلامة
بجد انت انسان ممتع
وفرحان قوى بمعرفتك
نورت ياعمونا