2009/01/26

كارت فاضى



عمرك جالك هديه ومعاها كارت فاضى
لو حصل معاك اكيد كنت بتفكر ان اللى جابلك الهديه بيهزر معاك
وايه الفايده او ايه هو وجه الهزار فى انه يديك كارت فاضى
مهو كان ممكن يجيبلك الكارت ويكتبلك فيه اهداء بمناسبه تانيه غير اللى جايبلك فيها الكارت
واهى تبقى هزار برضه

طب فكرت انه ممكن يكون فعلا مش عارف يكتب ايه؟

انا فعلا كدا دلوقت
بفكر ابعت كارت فاضى
مش عارف اكتب ايه

هو الموضوع مش صعب قوى
بس الصعب انك تجيب صيغه جديده تكتبها لشخص عزيز عليك
مش عارف تكتبله ايه

تكتبله فى عيد ميلاده كل سنه وانت طيب
وفى عيد الاضحى تقله عيد اضحى مبارك
وفى العيد الصغير عيد سعيد
وفى راس السنه تتمناله سنه سعيده

متهيألى هتبقى انسان نمطى شوية
ومش هتدى كل بنى ادم حقه

ـــــــــــــــــــــــ

يا جماعه انا عارف ان فى ناس هتقرا لحد ماتوصل للكلمتين اللى بكتبهم تحت السطر اللى سطرته فى البوست وهتحس برضه انها مش فاهمة حاجة
وانا مش عايز اكتر من كدا
اللى يفهم يفهم
واللى ميفهمش يحاول يفهم

ــــــــــــــــــــ

بس


4 comments:

وومن said...

ايه يا محمود ؟ مالك مش علي بعضك كدة لية ومتوتر وقلقان

ماسك الكارت في إيد والقلم في ايد وعمال تفكر تفكر تفكر

لو حد عزيز عليك هات صفحة بيضا فاضية واكتب اكتب اللي في قلبك

اول مرة مش عايعجبك
تاني مرة هاتلاقي نفسك بترغي

تالت مرة عاتعدل علية

وهكذا لحد ما تكتب جملة مفيدة بسيطة معبرة مش تقليدية

جرب كدة وابقي قولي
سلام

EmY said...

طيب ما يمكن الشخص ده مافيش اي كلام يعبر عن الي انت عايز تقوله او حاسه ليه

ولا انت ايه رأيك

حزينه said...

السلام عليكم
ساعات كتير فعلا مش بعرف اكتب
وببقى محتارة
وفعلا فى ناس مش بتكفيهم الكلمات
والكارت الفاضى
بيبقى اصلا مليان

حزينه

Hossam said...

Hello Mr.Mahmoud
اول زيارة ليا عندك وبجد مدونتك عجبتنى اوى كلامك حلو اوى وبيوصل بسرعة
الموضوع فكرتة رائعة وفعلا فى ناس معينة بنبقى عايزيين نبعتلهم كارت فاضى من كتر محنى مش لايقيين كلامك نقولهولهم
تحياتى عل المدونة الخفيفة الذيذة وتحياتى ليك