2008/05/05

مصر اللى كانت


اضراب 5 يونيو مصر فى نكسة

بالكلام دا بدأت مجموعة جديدة على الفيس بوك تطالب باضراب يوم النكسة
انا معارض انه يبقى فى اضراب فى اليوم دا
او اى اضراب فى الفترة اللى جاية
اى نعم انا اشتركت فى الجروب لكن مش معنى كدا انى معاه
انا هتكلم مع الناس دى واشرح وجهة نظرى وافهمهم لية ميبقاش فى اضراب

اولا الاضراب الجديد اندعى لية يوم الاضراب من غير مانعرف رد فعل الحكومة على مطالبنا
ودا فى حد ذاتة ركوب لموجة الاضرابات
كان المفروض نصبر ونشوف ردة فعل الحكومة
وبعد كدا نقرر نعمل اضراب تانى ولا لا

وبعدين لية اضراب تانى
هو احنا معندناش حاجة تانية

لية منعملش عريضة بمطالنا من اول ليه الابرة بقت ببريزة
لحد لية معندناش قنبلة نووية

ونقدمها للريس
ونطلب رد على كل استفسار فى العريضة

عشان يعرفوا الشعب عايز ايه
وبالمرة يبقى رد على الناس اللى بتقول الرئيس ميعرفش اللى بيحصل فى البلد

وبالمرة يبقى عندنا قايمة بمطال كل الشعب

لية نعمل اضراب تانى
ممكن نعمل انقلاب
انا مش بهرتل على المدونة
انا بتكلم بجد
نعلن عنة وعن خطواتة بدون خوف
نقول للريس مش عايزينك ونوصل للقصر الرئاسى ونرجع الحق لأصحابة
نرجعة للشعب
ونعمل انتخابات نزيهة بجد
منخليش حد يتحكم فينا

منخليش واحد زى رفعت السعيد يقول علينا عيال لاسعة

احنا مش لاسعين
انتم اللى بتلسعونا

احنا كل اللى عايزينة بلد قوى
محتاجين مصر قوية وغنية
محتاجين غازنا لينا مش لعدوينا
محتاجين لناس ترعانا مش ناس نهيبا
محتاجين نرجع مصر
مصر اللى كانت
مش مصر الحاضر

لو قارنا يا جماعة بين العصر دا واى عصر فات على مصر
هنعرف ان احنا فى مرحلة السقوط من على الهاوية بعوامل فيزياءية خطيرة

هنعرف ان الجاذبية الارضية اقوى من النظام
احنا محتاجين حد يمسك مصر قبل ماتقع على الارض
محتاجين حد يحب مصر مش يحب خيرها
محتاجين مصر ومصر وبس

مصر اللى كانت

6 comments:

بنوته مصرية said...

اول تعليق


هيييييييييييي

هرجع تاني

Anonymous said...

بص يابشا
انت هتاخد كتيييير اوي

انت احسن حاجه ليك تروح تنتحر
اهو اسمها تموت بمزاجك

والسجن للجدعان
وامن الدوله للرجاله والجدعان اوي اوي

تحياتي
و
محبتي

عبدالرحمن فارس

Bella said...

الحقيقة انا ايضا لااتفق مع هوجة الاضرابات التي عمت الفيس بوك

هذا الاسلوب سيفقد الاضراب معناه وتصبح الفكرة مبتذلة

نحن شعب اصلا ثقافة الاحتجاج عنده مصابة في مقتل وتحتاج لوقت طويل جدا لعلاجها فمن غير المعقول ان نكثف جرعات العلاج حتى يموت المريض بين يدينا

كده الناس ح تشوف الامر على انه تهريج

متفقة معك فيما قلت

تحياتي

Empress appy said...

اضراب وبعدها نضرب على قفانا ههههههههه
بص يا محمود لازم تبقى حاجه قويه تحصل مش لعبه كل شويه
خلاص مرحله الاضراب راحت

مدحت محمد said...

الاضراب بقى موضة

والله يامحمود اللى انت بتقوله ده حلم
جميل اوى
من حقك تحلم

لانه كان الاولى وقت الانتخابات
يحصل حاجة زى كدة
بس مش بعد الهنا بسنة مثلا

على العموم ربنا يقدم اللى فيه الخير

تحياتى وتقديرى

Ahmed Al-Sabbagh said...

عادى حصل خير هو كان اضراب تعبان بس مش مشكلة

الرسالة بتوصلهم

واكيد بالنظام ده هتبقى فى روح جديدة كل يوم

اشوفك الخميس ان شاء الله

احمد