رمضان احلى ايام

رمضان : الفانوس ابو شمعة
رمضان : صوت المسحراتى
رمضان : زينة وفرع نور
رمضان : صلاة تراويح فى كذا جامع
رمضان : فطار مع عيلتى
رمضان : سحور مع اصحابى
رمضان : بلح عجوا
رمضان : ناس بتصفى
رمضان : قعدة المغرب والفرجة على الناس وهى بتجرى

عمرك جربت فى يوم متروحش تفطر وتقعد فى الشارع ساعة الفطار
تتفرج على الناس اللى بتجرى عشان تلحق الفطار
فى الاول كنت بقول الناس دى بتجرى ليه
مع انهم صايمين طول النهار ومش قادريين يستنوا ربع ساعة كمان
حتى لو وصلت لأكتر من نص ساعة مش هتفرق من جملة الساعات اللى صايمينها
بس عرفت ان الناس دى بتستمتع جدا وهى قاعدة تاكل ولو بلحة واحدة ساعة الادان مع عيليتها

طب جربت فى مرة الفانوس القديم ابو شمعة
وتمسكة من مسكتة اللى بتجرح الايد وميهمكش شكل الدم اللى فى ايدك
وتحط الشمعة وتولعها وتقفل الباب وتلف بيه فى الشارع
وتيجى وقت الصلا تروح على الجامع وتقعد تلعب انت والعيال الصغيرة اللى قدك ورا الصفوف
ولما تكبر شوية تقف فى الصف وتصلى ولما تتعب تقعد برضة ورا الصفوف

جربت تقعد مع اصحابك على القهوة وتلموا من بعض كل واحد جنية ونص وتروحوا تجيبوا سحور
فول وطعمية وبتنجان مخلل ولو فى بطاطس يبقى الدنيا اتظبطت جامد
وتخلص وتروح تجيب علبة زبادى وتاكلها او تطلب زبادى بدل ماتقوم وترجع تقعد برضة على القهوة
وتروح البيت بعدها تلاقى عيلتك بتتسحر وتقعد تاكل معاهم وبطنك تتنفخ على الاخر
وكان زمان نقعد نسمع الشعراوى لحد الفجر
ونروح نصلى برضة فى الجامع
ومتعرفش ترجع عشان قابلت اصحابك وتقعدوا تتكلموا لحد مالنهار يطلع

جربت تروح لقرايبك تسلم عليهم وتهنيهم برمضان
ويجبولك الحلو وبرضة تاكل وبطنك تتنفخ تانى
وتسمع اغانى رمضان وتتفرج على بكار وتشوف شكل المسلسلات اللى بتتعرض
وتقرر بعديها هتتفرج على انهى مسلسل

جربت تخرج لما تسمع صورت المسحراتى تديلة رغيف عيش او نص جنية وتمسك البازه وتخبط عليها وتعمل صوت نشاز مش زى الصوت اللى بيعملة المسحراتى
وتتصل باصحابك تصحيهم مع انك عارف انهم صاحيين

جربت تعمل البسكوت والكعك مع مامتك واختك
وترخم عليهم وتبوظلهم شوية من العجين اللى بيعملوة
وتبقى مستمتع جدا وانت ماسك اللى انت عملتوا بايدك بعد مايستوى

جربت قبل الفطار تعمل السلاطة بايدك
وتقعد على الفطار تذل عيلتك كلها " انا اللى عامل السلاطة انا اللى عامل السلاطة " وتبقى فرحان
او تعمل العصير وتحضر السفرة
وتخش المطبخ بعد الاذان تقعد تخطف من الحلل مع انك عارف ان مامتك لو شافتك هتزعقلك

جربت تتفرج على الدورة الرمضانية مع انك مش بتحب الكورة
وتشوف اصحابك اللى نازلين فى الدورة وهما بيخسروا وبيطلعوا من اول دور
وتشمت فيهم وتقولهم عريتونا مع انها مش فارقة معاك

جربت تختم القرآن فى رمضان وتكمل قراية بعدية
وتصلى التراويح كاملة
وليلة 27 فى جامع عمرو بن العاص
وليلة العيد فى الحسين

ــــــــــــــــــــــــــــــــــــــــــــــــــــ
البوست دا مش اكتر من احاسيس بحسها فى رمضان
يمكن فى حاجات لسة بحسها منهم
وحاجات حاسس انها ماتت
ـــــــــــــــــــــــــــــــــــــــــــــــــــ
رمضان كريم

تلفونى ضاع

نصائح للى لقى التلفون

1- يشبل الشريحة ويحاول يوصلهالى
2- التلفون مش هيشتغل على اى شريحة تانية غير فى حالة واحدة انك تودية لبتاع موبيلات يفكلك الشفرة بتاعتة هياخد منك خمسة جنية
اصل انا عملتها فى الشريحة بتاعتى
3- ممكن تتصل برقم مكتوب علية home ودا رقم بيتنا وضيف علية رقم 3 فى الاول عشان الحكومة ضافتة
4- مبروك عليك التلفون بس بجد حاول تبعتلى الشريحة باى طريقة

تحديث
وفقا لما طلبتة المدونة الرائعة اللى بعتذرلها على عدم مجيئى يوم الجمعة اللى قبل اللى فاتت قدام الناس كلها خيخة واى كلام واللى طلبت نصائح للى ملقيش التلفون هقول نصائح بسيطة جدا ليهم
1-يقعدو يدعوا ربنا يخلى اللى لقى التلفون فى قلبة رحمة ويتصل ببيتنا
2-اللى كان معاهم رقمى يبعتولى رقمهم لحد ما اجيب تلفون
3-يدوروا على التلفون
بس

تحديث كمان وكمان
جبت تلفون وشريحة بديلة
يعنى دلوقتى معايا تلفون للى عايزنى
ونصيحة لبقيت الناس اللى كنت مسجل رقمهم يبعتوة من جديد عشان اسجل ارقامهم
شكرا
وشكرا لكل الناس اللى تعاطفت مع موبايلى
وخاصة للى سابوا تعليقات

دليفرى

بحلم ببكرة يكون اكثر اشراقا وانى يكون معايا ملاين من الجنيهات ويكون عندى مجموعة شركات وتكون مجموعة عالمية وعايز اتجوز ملكة جمال مصر وعايز وعايز وعايز يعنى من الاخر عايز كل حاجة فى الدنيا .

دا الكلام اللى كل الشباب بتقولة وهى قاعدة على القهوة عايزة كل حاجة تجيلها لحد عندها لكن يا خسارة مفيش دليفرى لتوصيل الاحلام الا اذا كنت انت اللى هتوصل الاحلام لحد عندك.

كل شئ ممكن يعنى ممكن تبقى عندك كل حاجة بتحلم بيها بس لازم تتحرك وتقوم من على القهوة وتشوف اول خطوة المفروض تبدء بيها ومتسوفش وتقول طيب لما اخلص القعدة دى لا المفروض تشوف حلمك وتبدأ فية من اول دلوقت.

ومفيش حاجة اسمها انا معنديش حلم لانك فى الحالة دى مش هترتقى لصفة الانسان انة بيفكر لمستقبلة وهتبقى ساعتها بتفكر فى دلوقت يعنى ازاى تعيش اللحظة ودا اكبر غلط لانك المفروض تفكر بعد اللحظة دى هيبقى موقفك اية فى الحياة وموقعك اية من الاعراب والحديث الشريف بيقلنا وبيحثنا على اننا نشتغل لبكرة بكل قوتنا

((اعمل لدنياك كأنك تعيش أبداً واعمل لآخرتك كأنك تموت غداً)) يعنى المفروض نفكر فى بكرة وشكلة ومنقولش ان الحاجات دى بتاع ربنا لان ربنا خلقنا وادانا عقلنا عشان نفكر بية والا مكناش وصلنا للتقدم اللى احنا عايشين فية لان كل واحد هيفكر فى لحظتة وملوش دعوة بغيرة وفى الاخر هقول لى وليكم احلم وامشى فى طريق يوصلك لحلمك ومتستناش الدليفرى.